Մամուլում տեղեկություներ են տարածվել այն մասին, թեր  Ազգային ժողովի նախագահ Արարատ Միրզոյանի գլխավորությամբ՝ իշխանությունները սուրհանդակ են ուղարկել Ազգային ժողովի «Բարգավաճ Հայաստան» խմբակցության ղեկավար Գագիկ Ծառուկյանի մոտ: Մասնավորապես, իշխանության ներկայացուցիչները Ծառուկյանին ասել են,  որ «Բարգավաճ Հայաստան» խմբակցությունից 7 պատգամավոր, այդ թվում՝ Գագիկ Ծառուկյանը, Էդուարդ Բաբայանը, Դավիթ Մանուկյանը, Վարդան Ղուկասյանը, Գեւորգ Պետրոսյանը, Նաիրա Զոհրաբյանը  պետք է հրաժարվեն իրենց պատգամավորական մանդատից, որպեսզի ԱԺ «Իմ քայլը» խմբակցության պատգամավորների եւ, առհասարակ, իշխանությունների միջեւ «փոխհրաձգությունը» դադարի: 

Գագիկ Ծառուկյանը, սակայն, կտրուկ  պատասխան է տվել՝ ասելով, որ մանդատները վայր չեն դնի։

 Անդրադառնալով այս տեղեկությանը՝  MegaNews.am-ի  թղթակցի հետ զրույցում «Բարգավաճ Հայաստան» խմբակցության պատգամավոր Շաքե Իսայանը նշեց՝ այդ լուրերն իրականությանը չեն համապատասխանում։

«Իհարկե, հասկանալի է, թե որ շրջանակներն են ջանում տարածել նման ապատեղեկատվություններ։ Բայց մեր քաղաքական թիմում այս ապատեղեկատվությունը, և, առհասարակ, նմանատիպ կեղծ տեղեկությունները չեն էլ քննարկվում․ մենք   դրանց վրա չենք կարող ժամանակ վատնել, զբաղված ենք ավելի լուրջ գործով,  հասարակության առջև ծառացած խնդիրներին լուծում տալու աշխատանքներով», —  նշեց Շաքե Իսայանը։

Խոսելով վարչապետ Նիկոլ Փաշինյանի ելույթների և  ֆեյսբուքյան գրառումների  մասին՝ Շաքե Իսայանը նշեց՝ չի  ցանկանում մեկնաբանել դրանք, քանի որ «Բարգավաճ Հայաստան»-ն ունի որդեգրած սկզբունքներ, որոնցից մեկն էլ սա է՝ անկախ ամեն ինչից՝ երբեք չցածրանալ,  չիջնել շրիշակի մակարդակից ցածր մակարդակի։

Պատգամավորը ընդգծեց՝  այս ընթացքում  զանգեր է ստանում   կամ հանդիպում  քաղաքացիների հետ․ բազմաթիվ քաղաքացիներ շատ լավ հասկանում են, թե  ինչպիսին է իրավիճակը, հասկանում են այդ ելույթների մակարդակը, և տեսնում են, թե ինչ իրավիճակում է հայտնվել երկիրը։ 

Շաքե Իսայանն ընդծեց՝ ցավում է, որ 2018 թվականից մինչ օրս  իշխանությունը  մարդկանց բաժանում է սևերի և սպիտակների, ատելության խոսք  է  տարածում իշխանության գործելաոճը   քննադատող, թերացումները վեր հանող  յուրաքանչյուր գործչի հասցեին։ Պատգամավորի խոսքով՝ հասարակությունն այդպես էլ ականատես չեղավ իշխանության ու ընդդիմության միջև ծավալվող որևէ   քաղաքական ու քաղաքակիրթ  բանավեճի, քանի որ իշխանությունը միշտ վիրավորանքներով է արձագանքում ընդդիմության հնչեցրած քննադատություններին։

«Այն ամենն ինչ կատարվում է այս օրերին, դրա ապացույցն է։ Երբ դու բարձրաձայնում ես ինչ-որ խնդիր և  քեզ պատասխանում են անձնական վիրավորանքներ, դա քաղաքական բանավեճի հետ ընդհանրապես կապ չունի», —  նշեց Շաքե Իսայանը՝ շեշտելով՝ ԲՀԿ-ն շարունակելու է բարձրաձայնել հասարակության առջև ծառացած  բոլոր խնդիրները, լուծումներ առաջարկել կամ լուծումներ տալ դրանց և ի վերջո անել քայլեր, որ  մեր երկրում իրավիճակ փոխվի։

«Ավելի քան ակնհայտ է, որ այն խոստումները, որոնք տվել էր իշխող քաղաքական ուժը,  չեն իրագործվում։ Խոստացված որևէ քայլ չի արվել, դա փաստ է, և   իսկ այս կամ այն հանգամանքի վրա բարդել մեղքը հարցի լուծում չէ։ Իշխանությունները երկու տարի մի բան  էին ասում, այսօր՝ բոլորովին այլ բան․  սա փաստում է, որ իշխող թիմում իրավիճակ է փոխվել, բայց, իհարկե, ոչ հօգուտ ՀՀ քաղաքացու», —  նշեց պատգամավոր Շաքե Իսայանը։

ՀԱՍՄԻԿ ՍԱՐԳՍՅԱՆ