Բանակցություններն այս պահին փակուղում են։ Այս կարծիքին է Արցախի ազգային հերոս Վիտալի Բալասանյանը, ով այսօր Անկախության օրվա առիթով այցելել էր Եռաբլուր զինվորական պանթեոն։ Դիտարկմանը, թե Հայաստանի դիվանագիտական կորպուսներն ասում են, թե բանակցությունները շարունակվում են, Բալասանյանն արձագանքեց, թե ասում են ասելու համար։ Բալասանյանը նկատեց՝ տարածաշրջանում, մանավանդ Հարավային Կովկասում իրավիճակը պայթյունավտանգ է։

Բալասանյանը համոզմունք է հայտնում, որ այսօր ՀՀ-ն և ԱՀ-ն շատ վտանգավոր ներքին և արտաքին քաղաքականություն են վարում.

«Վերաբերում է ՀՀ-ի ներսում կորոնավիրուսի պայմաններում բոլոր ձախողումներին՝ կրթություն, եկեղեցի, Ղարաբաղի հարց, դրական որևէ մոտեցում չեմ տեսնում, այս իշխանությունները պետք է հեռանան»,- հայտարարեց Վիտալի Բալասանյանը։

Վերջինս նկատում է նոր իշխանությունները Հայաստանը ներքաշել են հակամարտության մեջ, մինչդեռ նախկինում Հայաստանը միջնորդի դեր է կատարել։

-Տավուշյան դեպքերից հետո կարող ենք ֆիքսել, որ Հայաստանի քաղաքական իշխանությունը Հայաստանին ներքաշել է հակամարտության մեջ, որը շատ վտանգավոր է,- ասում է նա։

Ինչ վերաբերում է Նիկոլ Փաշինյանի հայտարարությանը, թե Արցախում կան դավադիր ուժեր, Բալասանյանն ասաց, թե ժամանակը ցույց կտա, որ թիվ մեկ դավադիր ուժը «այդ հայտարարությունն անողն է»։

«Դոսյեի» հրապարակման վերաբերյալ Բալասանյանը կոչ արեց անտարբեր լինել՝ հիշեցնելով, որ բազմաթիվ հայեր արտագնա աշխատանքի են մեկնում ՌԴ, նրանց վերաբերյալ ևս կարելի է նման չակերտավոր պնդումներ անել։ Բալասանյանը կարծում է, որ Նիկոլ Փաշինյանը պետք է ինքնակամ հեռանա, թե ում է տեսնում հաջորդ իշխանություն, վերջինս անուններ չհնչեցրեց։

Ինչ վերաբերում է Նիկոլ Փաշինյան- Գագիկ Ծառուկյան հեռակա բանավեճին, Բալասանյանն ասում է՝ կարելի է բոլորին ամոթանք տալ, քանի քաղաքական դեմքերը չպետք է այդպիսի հայտարարություններ անեն։

«Եթե մարդը ժամանակին հանցագործություն է կատարել, պետք է պատասխանատվության ենթարկվի, բայց Նիկոլ Փաշինյանը երևի եզակի է, որ ամբողջ օրը լայվեր է անում»,- նշեց նա։