Կարմիր խաչի միջազգային կոմիտեի ներկայացուցիչներն այցելել են Ադրբեջանում գտնվող հայ սպա Գուրգեն Ալավերդյանին։ Այս մասին այսօր Tert.am-ը տեղեկացավ Կարմիր խաչի միջազգային կոմիտեի հայաստանյան գրասենյակի հաղորդակցման ծրագրերի պատասխանատու Զառա Ամատունուց։

Նա նշեց, որ մանրամասներ ներկայացնել չի կարող, քանի որ այս հարցերը քննարկվում են իշխանության հետ և այս մասին խոսելը միայն իշխանության իրավասության սահմաններում է։

Ամատունու խոսքով՝ Ալավերդյանի հետ հանդիպումը եղել է օգոստոսից սկսված հերթական հանդիպումների շրջանակներում։

Հիշեցնենք, որ օգոստոսի 23-ին ՀՀ ՊՆ-ն հայտնեց, որ սպա Գուրգեն Ալավերդյանը մարտական հենակետը ստուգելու ընթացքում եղանակային անբարենպաստ պայմանների պատճառով  մոլորվել է և հայտնվել Ադրբեջանի տարածքում։ Ավելի ուշ Ադրբեջանի ՊՆ-ի կողմից հայտարարություն տարածվեց, թե նա դիվերսիոն հարձակում է իրականացրել։