Բնակարան ՌԴ-ում, ավտոմեքենա, հողամաս. ՔՊ-ական թաղապետերի ճոխ ձեռքբերումները
Վերջին շրջանում մեկը մյուսի հետևից ի հայտ են գալիս նորանոր պատմություններ Երևանի նախկին թաղապետերի մասին և դրանք հրամցվում են հանրությանը հատկապես իրավապահ համակարգի կողմից, նպատակն էլ՝ նախկիններին կոռումպացված և թալանչի հանելն է: Նշենք, որ Երևանի վարչական շրջանների նախկին ղեկավարների անվան շուրջ պտտվող և ոչ մի պատմություն կամ մեղադրանք մինչ օրս չի հաստատվել: Հասկանալի է, որ այս ամենը արվում է Երևանի ապաշնորհ ղեկավարումը քննադատողների ուշադրությունը դեպի նախկինները շեղելը և նրանց ֆոնին առավել օրինապաշտ իշխանություն երևալը: Սակայն, այդպե՞ս է դա արդյոք: Ուսումնասիրելով Երևանի վարչական շրջանների ղեկավարների ՝ նախորդ տարի հայտարարագրված ունեցվածքը և համեմատելով դա նրանց աշխատավարձերի հետ` ստացվում է բավական ուշագրավ պատկեր. նրանցից և ոչ մեկ չէր կարող այդքան կտրուկ բարելավել իր սոցիալ-ֆինանսական դրությունը՝ միայն ու միայն ժողովրդին տքնաջան ծառայելով, գրում է lurer.com-ը:
Դիցուք՝ Ավան վարչական շրջանի ղեկավար Արա Դանիելյանը նախորդ տարի Աջափնյակում բնակարան է գնել: Ընդ որում, ուշագրավ է, որ բնակարանը նա գնել է ոչ իր ղեկավարած վարչական շրջանում: Նա նաև հայտարարագրել է 5,000,000.00 կանխիկ դրամ և 380 հազար ռոբլի: Աշխատանքի վարձատրությունն էլ ընդամենը 5,953,200.00 դրամ է կազմել: 2018-ին ի դեպ նա 240,000.00 դրամի աշխատավարձ էր հայտարարագրել:
Արաբկիր վարչական շրջանի ղեկավար Արամ Դանիելյանը հայտարարագրել է ընդամենը 5,867,252.00 դրամի աշխատվարձ, սակայն ուշագրավ է, որ դրա հետ մեկտեղ նա հայտարարագրել է 21,000,000.00 դրամ, 20,000.00 դոլար, 1,800,000.00 ռուբի և 2,000.00 եվրո:
Երևանի Կենտրոն վարչական շրջանի ղեկավարի տեղակալ Արմեն Ազիզյանը 2019-ին գնել է բնակարան և հողամաս՝ Կոտայքում և Ավան վարչական շրջանում: Բացի այդ նա ձեռք է բերել նաև Nissan ավտոմեքենան:և հայտարարագրել է 22,000.00 ԱՄՆ դոլար: Հիշեցնենք, որ Ազիզյանը նախկինում ՀՀ ՊԵԿ մաքսանենգության դեմ պայքարի վարչության Շիրակի տարածաշրջանային բաժնի Բավրա բաժանմունքի պետն էր: 2018-ին նա հայտարարագրել էր 16,000.00 ԱՄՆ դոլար և 499,370.00 աշխատավարձ՝ դրանով իհարկե բնակարան և ավտոմեքենա չես գնի:
Երևանի Նուբարաշեն վարչական շրջանի ղեկավար Անդրանիկ Գասպարյանը այս տարի արդեն իսկ հաջողացրել է գնել BMW ավտոմեքենա, մի դեպքում, երբ իր աշխատանքի դիմաց ստացված վարձատրությունը կազմել է 1,200,000.00 դրամ: Պաշտոնյան նաև հայտարարագրել է 7,500,000.00 դրամ, 5,200.00 ԱՄՆ դոլար, 12,000.00 եվրո, 50,000.00 ռուբլի:
Քանաքեռ –Զեյթուն վարչական շրջանի ղեկավարը նախորդ տարի ՌԴ Տուլա քաղաքում բնակարան է ձեռք բերել շուրջ 1 միլիոն ռուբլիով: Աշխատանքի վարձատրությունը կազմել է 5,946,408.00 և 6,000,000.00 ՀՀ դրամ:
Երևանի Արաբկիր վարչական շրջանի ղեկավարի տեղակալ Դավիթ Բալասանյանը` 4,272,728.00 դրամի աշխատավարձով, նախորդ տարի ձեռք է բերել Porsce ավտոմեքենան:
Երևանի Մալաթիա-Սեբաստիա վարչական շրջանի ղեկավար Դավիթ Կարապետյանը նախորդ տարի ձեռք է բերել Nissan ավտոմեքենան, սակայն հայտարարագրել է ընդամենը 6,000,000.00 դրամ և 10 միլիոն դրամի թանկարժեք զարդեր:
Վերը նշված օրինակները վկայում են այն մասին, որ եթե այսօրվա իշխանությունները փորձում են թալանչի հանել նախկիններին, ապա ավելորդ չի լինի խորանալ նաև սեփական թիմակիցների՝ կարճ ժամանակում կտրուկ բարելավված սոցիալ-ֆինանսական դրության հարցում, գուցե այստեղ էլ վերհանվեմ երևույթներ, որոնք հարիր չեն իշխանության ներկայացուցիչներին, առավել ևս, եթե այդ ներկայացուցիչը իշխանության է եկել թավշյա հեղափոխությամբ՝ մերժելով հինը…
