Հայկական կողմերը՝ Հայաստանը և Արցախը, հնարավորությունների սահմանում կանեն ամեն ինչ՝ ապահովելու Արցախի բնակչության անվտանգությունն ու համարժեք արձագանքելու Ադրբեջանի ագրեսիային: Այսօր տեղի ունեցած ասուլիսի ընթացքում հայտնել է ԱԳՆ մամուլի խոսնակ Աննա Նաղդալյանը: Նա հիշեցրել է, որ Ադրբեջանը թիրախավորել է Արցախի խաղաղ բնակչությանը, նրանց շրջանում արդեն զոհեր կան:

«ԱԳՆ-ն արդեն տարածել է հայտարարություն, որը խստորեն դատապարտում է Ադրբեջանի ագրեսիան: Ադրբեջանի ռազմական և քաղաքական ղեկավարությունը կրելու է ամբողջ պատասխանատվությունն Արցախի դեմ իրականացվող ագրեսիայի համար: Առավոտից նախարարը կապ է պահել ԵԱՀԿ Մինսկի խմբի համանախագահների հետ: Նա նաև հեռախոսազրույցներ է անցկացրել իր գործընկեր արտգործնախարարների հետ: ՀՀ արտգործնախարարը զրուցել է Ռուսաստանի, Վրաստանի, Լիտվայի արտգործնախարարների հետ»,-հայտնել է Նաղդալյանը: