Հայ արիները կարեւորում են թշնամուն համարժեք պատժելու եւ որոշակի հարձակողական գործողությունների անհրաժեշտությունը

Այսօր՝ սեպտեմբերի 27-ի առավոտյան, ադրբեջանական հերթական լայնածավալ սադրանքների ընթացքում գումարվեց Հայ Արիական Միաբանության (ՀԱՄ) Գերագույն Խորհրդի արտահերթ եւ արտակարգ նիստը, որին մասնակցում էր նաեւ ՀԱՄ «Արցախյան պատերազմի մասնակիցներ»-ի խորհուրդը:
Հայ արիների առաջնորդ Արմեն Ավետիսյանը տեղեկացրեց, որ կրկին վերահաստատվել է ՀՀ եւ ԼՂՀ զինուժերի կողքին լինելու եւ առաջնագծում մարտական գործողություններին մասնակցելու պատրաստակամությունը, միաժամանակ կոչ է հղվել աշխարհի տարբեր անկյուններում գործող հայ արիների կառույցների զինական գործին պատրաստ բոլոր հայորդիներին՝ հայկական պետության առաջին իսկ կոչի դեպքում՝ մեր բանակին կողքին կազմ ու պատրաստ կանգնելու համար:
Արմեն Ավետիսյանը նշեց, որ հայ արիների կոչին միացել են նաեւ համախմբված հայ ազայնականները, որոնք հայկական բանակի շուրջ համախմբվելու կոչը փոխանցել են նաեւ իրենց սփյուռքյան կազմակերպություններին:
Արտահերթ եւ արտակարգ նիստը մեկ անգամ եւս կարեւորել է հայկական բանակի առավել զորացման կարեւորությունը՝ համահայկական բանակի ձեւավորմամբ, որը նույն ազգ-բանակի ստեղծումն է:
Հայ արիների աշխարհասփյուռ կառույցներից արդեն կան արձագանքներ, եւ ՀԱՄ առաջնորդը վստահություն հայտնեց, որ այսպես է լինելու աշխարհի բոլոր հայերի արձագանքը: Նա կարեւորեց թշնամուն համարժեք պատժելու հարցը եւ անգամ որոշակի հարձակողական գործողությունների անհրաժեշտությունը:
Հայ արիները կոչ են հղում նաեւ մեր պետության պատասխանատուներին, ռազմական եւ արտաքին գերատեսչության ղեկավարներին, որ համագործակցեն համաշխարհային բոլոր բեւեռների հետ՝ Միացյալ Նահանգներ եւ Եվրամիություն, Ռուսաստանի Դաշնություն եւ Չինաստան՝ հաշվի առնելով, որ այդ բեւեռները կարող են գործակցել նաեւ թուրք-ադրբեջանական դաշինքի հետ: Պետք է հաշվի առնել նաեի Իրանի, Հունաստանի ու Կիպրոսի եւ արաբական աշխարհի հետ անմիջական համագործակցությունը (բանակցելով նաեւ ամիսներ առաջ Ֆրանսիայի մասնակցությամբ Եգիպտոսում ձեւավորված հակաթուրքական դաշինք հետ):
Հայ արիները եւս մեկ անգամ կոչ են հղել հայությանը՝ մի կողմ դնել ներքին տարաձայնությունները եւ այս պահին հանդես գալ համախմբված, միակամ եւ հաղթական ոգով: