Մենք նահանջելու տեղ չունենք: Այո՛, մենք բոլորս պատրաստ ենք զոհվել հանուն Ղարաբաղի եւ հանուն Հայաստանի: Այդ մասին սեպտեմբերի 27-ին Հայաստանի Ազգային ժողովի արտահերթ նիստի ժամանակ երկրում ռազմական դրություն եւ համընդհանուր զորահավաք հայտարարելու մասին հարցը քննարկելիս հայտարարել է «Բարգավաճ Հայաստան» կուսակցության պատգամավոր Նաիրա Զոհրաբյանը:

Այդուհանդերձ, նրա խոսքով, բոլորը պետք է ապրեն հանուն Ղարաբաղի, եւ հանուն Հայաստանի:

«Մեզնից յուրաքանչյուրը պետք էանի իր գործն իր տեղում»,-ասել է Զոհրաբյանը:

Մասնավորապես, նա նշել է, որ որպես մարդու իրավունքների մշտական հանձնաժողովի նախագահ՝ արդեն դիմել է բոլոր եվրոպական կառույցներին:

«Ես հստակ ներկայացրել են իրավիճակն ու Թուրքիայի անթույլատրելի մասնակցությունը: Ինձ չի բավարարում միջազգային կազմակերպությունների նրբագեղ դիվանագիտական հռետորաբանությունը, եւ հակամարտության կողմերը միմյանց հետ պարբերաբար հավասարեցնելը: Ադրբեջանը խախտել եւ թքել է բոլոր միջազգային պայմանագրերի վրա, իր իսկ կողմից ստորագրված՝ խաղաղ բնակչության եւ քաղաքացիական ենթակառուցվածքների վրա հարձակում չգործելու մասին կոնվենցիայի վրա»,-ընգծել է խորհրդարանականը:

Հիշեցնենք, որ կիրակի՝ սեպտեմբերի 27-ին, Ադրբեջանի Զինուժը, կոպտորեն խախտելով միջազգային հումանիտար իրավունքի գործող նորմերն ու հակամարտության լուծման խաղաղ բանակցային գործընթացի տրամաբանությունը, կիրառելով հրթիռահրետանային միջոցներ եւ ավիացիա, հարձակվել է շփման գծի ամբողջ երկայնքի ուղղությամբ՝ թիրախավորելով Պաշտպանության բանակի մարտական դիրքերն ու Ղարաբաղի խաղաղ բնակավայրերը: