«Լեռնային Ղարաբաղն արնահոսող վերք է, իսկ այդ ցավից տառապում է ամբողջ Կովկասը». Կադիրովը Հայաստանին և Ադրբեջանին արյունահեղությունը դադարեցնելու կոչ է արել
Չեչնիայի ղեկավար Ռամզան Կադիրովը հայ և ադրբեջանցի ժողովուրդներին կոչ է արել դադարեցնել արյունահեղությունը՝ առաջարկելով համայն միջազգային հանրությանը ներգրավվել այդ գործընթացում և վերականգնել խաղաղությունն Արցախում:
Ինչպես նշում է ՏԱՍՍ-ը, Կադիրովն այս մասին գրել է իր թելեգրամյան ալիքում:
«Այսօր կրկին տագնապալի լուրեր են ստացվում Ղարաբաղից, Ադրբեջանից ու Հայաստանից: Կոչ եմ անում եղբայրական ադրբեջանցի և հայ ժողովուրդներին դադարեցնել անիմաստ արյունահեղությունը, որը ավելի ու ավելի է հեռվացնում հակամարտությունը ողջամտության և մարդկայնության հասկացողություններից»,-գրել է Կադիրովը:
Նա դիմել է միջազգային հանրությանը՝ առաջարկելով ՄԱԿ-ին, բոլոր հարևան պետություններին, հոգևոր առաջնորդներին ներգրավվել Կովկասում խաղաղության վերականգնման գործընթացում:
«Լեռնային Ղարաբաղն արնահոսող վերք է, որին որոշակի ուժեր ապաքինվելու հնարավորություն չեն տալիս, իսկ այդ ցավից տառապում է ամբողջ Կովկասը: Ռուսաստանն ուղղակի տիտանական ջանքեր է ներդնում, որպեսզի կողմերին ստիպի բանակցային սեղանի շուրջ նստել: Սակայն դրա համար անհրաժեշտ է մեկընդմիշտ դադարեցնել ռազմական գործողությունները»,-ասել է Կադիրովը:
