«Կանգնեցրե՛ք պատերազմը. մենք խաղաղության կողմնակից ենք». Գարիկ Մարտիրոսյանը՝ ԼՂ դեմ Ադրբեջանի հարձակման մասին
Ռուսաստանաբնակ հումորիստ, շոումեն Գարիկ Մարտիրոսյանն ինստագրամյան իր էջում անդրադարձել է Լեռնային Ղարաբաղի դեմ Ադրբեջանի հարձակմանը՝ հակիճ ներկայացնելով երկրների միջև զարգացած իրավիճակը և ադրբեջանական իշխանություններին մեղադրել պատերազմ հրահրելու համար։
«Պատերազմ․ Ադրբեջանը, Թուրքիայի լիակատար ռազմական և տեղեկատվական աջակցությամբ (և սա արդեն որևէ մեկը չի թաքցնում) նոր պատերազմ է սկսել հայերի դեմ: Պատերազմն ու բռնությունը ադրբեջանական նավթային ռեժիմի բարբարոսական և միամիտ մեթոդներն են, որոնց նպատակը հայ բնակչությանը վախեցնելն է: Եվ այս ամենը տեղի է ունենում 21-րդ դարում, երբ բոլորին կատարվածը տեսանելի ու լսելի է։ Այսօր առավոտյան ադրբեջանական զորքերի կողմից հայկական բնակավայրերի հրետանային ռմբակոծությունների հետևանքով սպանվել ու վիրավորվել են հայ խաղաղ բնակիչներ: Սպանությունները շարունակվում են նույնիսկ այս պահերին»,- նշել է Մարտիրոսյանը և խոսել նաև ադրբեջանական իշխանությունների տարածած ապատեղեկատվության մասին։
«Որևէ հայ պատերազմ չի ուզում։ Ո՛չ մեր կողմից, ո՛չ նրանց կողմից զոհեր մենք չենք ուզում։ Կանգնեցրե՛ք պատերազմը։ Մենք խաղաղության կողմնակից ենք»,- եզրափակել է նա։
