Այսօրվա դրութամբ մեր միջազգային գործընկերների հետ թե՛ երկկողմանի, թե՛ միջազգային կազմակերպություններում հիմնականում քննարկում ենք այն ռազմական գործողությունները կամ պատերազմը, որը սկսվել է այսօր։ Այս մասին լրագրողների հետ զրույցում ասել է ՀՀ ԱԳ նախարարի տեղակալ Ավետ Ադոնցը։

«Մենք այսօր քննարկել ենք ռազմական գործողությունները, դրանց բազմաբնույթ, անսովոր լինելը եւ մեր միջազգային գործընկերները հասկանում են դա։

Զարգացումները, որոնք տեղի են ունենում այսօր ամեն ժամ, ամեն րոպե փոխվում են եւ ակնհայտ է, որ բոլոր գնահատականները եւ բոլոր դիրքորոշումները համապատասխանաբար փոխվելու են։ Վաղը ես վստահ եմ, որ կլինեն այլ հայտարարություններ նույն մեր գործընկեր պետություններից, որոնք որ այսօր արդեն հանդես են եկել», ասել է Ավետ Ադոնցը։

Դաշնակից ու գործընկեր պետությունների հետ երկխոսությունը ԱԳ փոխնախարարի խոսքով, շարունակվում են, բայց հայկական կողմը խնդրողի դերում չէ։

«Մենք խնդրողի դերում չենք բացարձակ, ասենք, որ մեզ սպանո՞ւմ են, պատերա՞զմ է տեղի ունենում։ Մեր դաշնակիցների կողմից զենքի վաճառքի հարցը այսօրվա թեմա չէ, մենք այն բարձրացրել ենք շատ վաղուց։ Ինչ վերաբերում է Ռուսաստանի կամ Բելառուսի մեր գործընկերների հետ երկխոսությանը, ապա այսօր դրանք ընթանում են բավականին դինամիկ եւ ինտենսիվ։

Ավետ Ադոնցի խոսքով՝  այն, ինչ տեղի է ունենում շփման գծի երկայնքով, լայնածավալ եւ բազմաբնույթ պատերազմը, ես դա շատ խորը ձեւակերպում եմ համարում, այսօրվա արձագանքներից, բացառությամբ մի քանիսի, այո, մենք բավարարված ենք։ Միայն Ռուսաստանի հայտարարությունը չէր, որ բալանսավորված էր։ Ես նաեւ կհիշատակեի քաղաքակիրթ աշխարհը ներկայացնող պետությունների, մասնավորապես, ԵՄ-ն այս պահի դրությամբ իրենց բոլոր հայտարարությունների կենտրոնական կետն իրավիճակը հանգստացնելն է։ Պատերազմ է, անկանխատեսելի փուլերով է զարգանում։ Պարզ պատերազմ չէ, որովհետեւ մեր հակառակորդը այսօր գործում է մի փոքր անսովոր թե՛ աշխարհագրությունը հաշվի առնելով, թե՛ գործիքները։ Այդ իսկ պատճառով ես ավելի քան վստահ եմ, որ այդ հայտարարությունների որակը օր օրի կփոխվի։ Իսկ ինչ վերաբերում է բալանսավորված հայտարարություններին, իհարկե դժգոհ ենք։ Ես դժգոհ եմ, որովհետեւ մենք բոլորս հասկանում ենք, որ պատերազմական իրավիճակում կա ագրեսոր եւ բոլորս հասկանում ենք, թե ով է այդ ագրեսորը, եւ ցանկացած  բալանսավորված հայտարարություն նպաստում է լարվածության աճին ու զարգացմանը», ասել է Ավետ Ադոնցը։