Ազգային ժողովի արտահերթ նիստում պատգամավոր ազգությամբ եզդի Ռուստամ Բաքոյանը հայտնեց, որ երեկ երեկոյան եզդիական Ակնալճի սրբատեղիում եզդիական ջոկատ են ձևավորել ու պատրաստ են մեկնել Արցախ՝ պաշտպանելու ընդհանուր սահմանը, ինչպես դա արեցին քառօրյայի ժամանակ. «Այդ հողը Թեմուրի, Քյարամի, Սիդարի, Համլետի, Բորիսի արյունով է սրբագոծվել: Մենք՝ եզդիներս, թույլ չենք տա, որ այստեղ երբևէ թշնամիներ հայտնվեն:

Մենք այս հողի համար պայքարել ենք արյան գնով, հիմա էլ պատրաստ ենք պայքարել: Հիմա էլ սահմանին եզդի զինվորները կանգնած են ու իրենց հայ զինվոր եղբայրների հետ պայքարում են, կռվում մեր ընդհանուր թշնամու դեմ»:

Բաքոյանն ասաց, որ երեկվանից բազմաթիվ եզդիներ, չսպասելով ջոկատի ձևավորմանը, մեկնել են Արցախ. «Մենք մեր կյանքի գնով պայքարել ենք Սարդարապատում Բաշ Ապարանում, Արցախյան պատերազմում, որի ժամանակ տվել ենք 40 զոհ:

Ապրիլյանի ժամանակ տվել ենք Թեմուրին, Քյարամին, Սիդարին, Համլետին, Բորիսին: Հիմա էլ ոչ մի քայլ հետ չենք անելու: Մեր դեմքն ուղղված է դեպի Արցախ: Մենք միշտ եղել ենք իրար կողքի ու հիմա էլ ևւս մեկ անգամ ապացուցում ենք մեր եղբայրությունը: Մեր բարեկամությունն անդավաճան է: Մենք մեր Արցախում պետք է անվտանգությնաք գոտին ընդլայնենք: Սրա մասին թշնամին պետք է իմանա:

Ի տարբերություն Ադրբեջանի, որն իր ազգային փոքրամասնություններին ստիպելով է մղում առաջնագիծ և իրենց կորուստների 70 տոկոսը հենց ազգային փոքրամասնություններ են, մենք Հայաստանում ինքնակամ ցանկանում ենք պաշտպանել մեր ընդհանուր սուրբ հողը, մեր հայրենիքը: Հայաստանի ամեն սանտիմետրը մեզ համար սուրբ է ու թանկ: Հաղթելու ենք»:

Ռուստամ Բաքոյանը Ազգային ժողովի ամբիոնի մոտ ելույթ ունեցավ Հայաստանի դրոշը, գերբը կրող շապիկով: