ՌԴ Մարդու իրավունքների հանձնակատար Տատյանա Մոսկալկովան դիմել է իր ադրբեջանցի և հայ գործընկերներ Սաբինա Ալևիային և Արման Թաթոյանին՝ կոչ անելով նպաստել Լեռնային Ղարաբաղի հակամարտության խաղաղ կարգավորմանը: ТАСС գործակալության փոխանցմամբ՝ համապատասխան հայտարարությունը հրապարակվել է Մոսկալկովայի կայքում:

«Դիմում եմ իմ գործընկերներին՝ Ադրբեջանի Հանրապետության և Հայաստանի Հանրապետության մարդու իրավունքների հանձնակատարներին՝ հորդորել իրենց պետությունների կառավարություններին զսպվածություն դրսևորել և ձեռնարկել բոլոր հնարավոր միջոցները, որոնք կարող են բերել խնդիրների լուծմանը ոչ թե ուժով, այլ երկխոսության և բանակցությունների ճանապարհով՝ իրավիճակի կարգավորման նպատակով: Վստահ եմ, որ մարդասիրությունը և առկա միջազգային իրավական մեխանիզմները թույլ կտան խուսափել բռնությունից և պաշտպանել քաղաքացիների հիմնարար իրավունքները»,- ասվում է հայտարարության մեջ:

Մոսկալկովան ընդգծել է, որ «պատրաստ է օգնություն տրամադրել յուրաքանչյուրին, ով ԼՂ հակամարտությամբ պայմանավորված կյանքի դժվարին իրավիճակում է հայտնվել: Վերջինս հավելել է, որ զոհերի և վիրավորների մասին լուրերը, այդ թվում՝ խաղաղ բնակչության շրջանում, խոր վիշտ են առաջացնում: