Արցախի համար հավաքվել է 15 միլիոն դոլար․ Պետնախարար
Օպերատիվ շտաբը, կառավարությունը ստեղծել են վնասների գնահատման հանձնաժողով։ Հենց վաղվանից սկսելու ենք վնասված ենթակառուցվածքների վերանորոգումն ու վերակառուցումը։ Ասուլիսին ասաց Արցախի Պետնախարար Գրիգորի Մարտիրոսյանը։
«Մեր բազմաթիվ հայրենակիցներ մեծ ծավալով օգնություն են ցուցաբերում Արցախին։ Այս պահի դրությամբ հավաքագրված գումարը գերազանցում է 15 մլն դոլարը»,- ասաց Մարտիրոսյանը։
Պետնախարարը հայտնեց, որ Հայաստանի կառավարության հետ համատեղ մշակվում է օգնության կանոնակարգման գործընթաց։ Վաղը կհրապարակվի նաև թեժ գիծի հեռախոսահամար, որը կպատասխանի Արցախ ելքի և մուտքի հետ կապված հարցերին։
Մարտիրոսյանը հավաստիացրեց, որ Արցախում վճարվել են աշխատավարձերը, թոշակները նույնպես ժամանակին կվճարվեն։
Անդրադառնալով կոմունալ վճարումներին՝ պետնախարարը հայտնեց, որ համաձայնեցված է բոլոր սպասարկող ընկերությունների հետ, որպեսզի կոմունալ ծառայությունների վճարումները չկատարելու դեպքում անջատումներ չլինեն։
