Րոպեներ առաջ Արցախի տեղեկատվական շտաբում ԱՀ ընթացող պատերազմի հակառակորդի ձեռնարկած գործողությունների ոչ մարդասիրական դեմքի մասին խոսել է Երևանի Մխիթար Հերացու անվան բժշկական համալսարանի ռեկտոր Արմեն Մուրադյանը։ 

Բժիշկ պրոֆեսորն իր հիացմունքն է հայտնել հայկական երկու հանրապետությունների բժշկական համակարգերի մասնագիտական բարձր հոգածության նկատմամբ և իր վրդովմունքը հայտնել հակառակորդի անմարդկային և բոլոր կանոններից դուրս գործողությունների մասով։

 

Այս օրերին, երբ աշխարհը պանդեմիայի պայմաններում պայքար է տանում դաժան արհավիրքի հանդեպ, Ադրբեջանը՝ Թուրքիայի լայն աջակցությամբ տեռորիստների, վարձկանների, կործանիչ զինատեսակների միջոցով խոցում է նաև քաղաքացիական բնակավայրեր։ Այս ավանտյուրայի զոհ են դառնում ոչ միայն զինվորները, այլ նաև Արցախի խաղաղ բնակչությունը, պատերազմը լուսաբանող օտարերկյա լրագրողները, ովքեր փորձում են աշխարհին պատմել ողջ ճշմարտությունը,֊ասում է պարոն Մուրադյանը։ Բժշկի հումանիտար լեզվով Արմեն Մուրադյանը իր միջազգային գործընկերներին կոչ է անում «ստոպ» ասել ագրեսորին։ Պանդեմիայի պայմաններում կատարվողը ոչ այլ ինչ է քան ահաբեկչություն:

 

Արմեն Մուրադյանն իր շնորհակալությունը հայտնեց կրակի տակ աշխատող իր գործընկերներին՝ խնդիրը գերազանց լուծելու համար։ Վիրավորների ստացած վնասվածքների բնույթը հուշում է, որ հակառակորդը գործում է մարդասիրությունից դուրս։ Հիմնականում բեկորային խոցումներ են, որոնք հուշում են, որ կրակը թիրախային չէ, այլ կիրառվում է մասսայական խոցման զենք։ Բազմաբեկոր վիրավորումները վկայում են զինատեսակների քաոտիկ բնույթի մասին։ Այս փաստի հանդեպ Արմեն Մուրադյանը հրավիրում է միջազգային կազմակերպությունների ուշադրությունը։