Ես շատ մտահոգված եմ Ադրբեջանի կողմից Արցախի և Հայաստանի դեմ սանծազերծված ագրեսիայից: Այս մասին Tert.am-ի հետ զրույցում ասաց Ֆրանսիայի խորհրդարանի իշխող կուսակցության հայազգի պատգամավոր Դանիել Ղազարյանը:

«Ես հետևում եմ իրադարձություններին մեծ ուշադրությամբ և շտապ հրադադարի հույս ունեմ»,- ասաց նա:

Նրա խոսքով` ինքը ողջունում է իր կուսակցության առաջնորդի`երկրի նախագահ էմանուել Մակրոնի հայտարարությունը Եվրամիության գագաթնաժողովում, որտեղ նա շատ հստակ ասաց, որ Բաքուն է «առանց պատճառի» սկսել պատերազմը:

«Նա նաև ավելացրեց, որ ունի հավաստի տեղեկություն, որ սիրիացի ջիհադիստները միացել են Ադրբեջանին Թուրքիայի ամբողջական աջակցության միջոցով և այս վարքագիծն անվանեց Անկարայի կողմից «կարմիր գծերը» ամբողջությամբ խախտում: Ես հույս ունեմ, որ մեր նախագահը կկարողանա ստեղծել կոալիցիա Եվրամիության, ՄԱԿ-ի և ՆԱՏՕ-ի միջև`կանգնեցնելու ագրեսիան և կանխելու Թուրքիայի էքսպանսիոնիզմը»,- ասաց նա:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Երեկվա դրությամբ Արցախի զինուժը խոցել է հակառակորդի 17 ուղղաթիռ, 20 ինքնաթիռ (4-ը Սու–25), 113 անօդաչու թռչող սարք, 250 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 2 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 3000 զոհ, հազարավոր վիրավորներ։

Հայկական կողմից, նախնական տվյալներով, կա 158 զոհ և 200-ից ավելի վիրավոր։

Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում՝ 11 մարդ։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։