«Արդեն մեկ շաբաթ Արցախի ՊԲ-ն, մեր կամավորական ջոկատները կենաց ու մահու կռիվ են տալիս Արցախի սրբազան հողի վրա։ Այս պահի դրությամբ ունենք բազմաթիվ մարդկային կորուստներ՝ զինվորական և քաղաքացիական։ Շարքից դուրս է եկել մեծ թվով զինտեխնիկա, բայց հակառակորդն այդպես էլ ի վիճակի չի եղել լուծել որևէ ռազմավարական խնդիր»,- ուղերձով դիմելով ժողովրդին՝ հայտարարեց ՀՀ վարչապետ Նիկոլ Փաշինյանը:

ՀՀ վարչապետի խոսքով՝ մենք ապրում ենք մեր հազարամյա պատմության ամենավճռորոշ փուլում. «Ադրբեջանաթուրքական հրոսակախմբերը միայն ռազմական կամ ռազմաքաղաքական հարց լուծելու նպատակ չէ, որ հետապնդում են, նրանք միայն Ղարաբաղի և Ղարաբաղի հետևից չէ, որ եկել են, նրանք չեն եկել միայն տարածքներ, գյուղեր կամ քաղաքներ գրավելու նպատակով, նրանց նպատակը հայությունն է, նրանց նպատակը Հայոց ցեղասպանության՝ իրենց քաղաքականության շարունակությունն է։ Եվ նրանք խնդիր են դրել Հայոց ցեղասպանությունը շարունակելու այսօր»,- հայտնեց Նիկոլ Փաշինյանը:

Ուղերձի ժամանակ նա հայտարարեց, որ ներկայիս իրադրությունը նոր Սարդարապատ է. «Մեզնից յուրաքանչյուրը պարտավոր է ինքն իրեն նվիրել մեկ նպատակի՝ հաղթանակի նպատակին: Մեզնից յուրաքանչյուրը ամեն վայրկյան պիտի պատրաստ լինի գտնվել այդ հաղթանակի առաջնագծում, ու մենք կհաղթենք, մենք անպայմանորեն կհաղթենք ու չկասկածե՛ք, մենք կհաղթենք»,- հայտարարեց ՀՀ վարչապետը: