Ամերիկյան Fox News հեռուստաալիքը հաղորդում է Թուրքիայի կողմից սիրիացի ահաբեկիչների հավաքագրման մասին նրանց Լեռնային Ղարաբաղում պատերազմ ուղարկելու համար:

Սիրիացի ահաբեկիչը, որը ցանկացել է անանուն մնալ, հաղորդել է Fox News-ին, որ այս շաբաթ մարտի դաշտում սպանվել է իր հայրենի Ռաստանա քաղաքից չորս տղամարդ: Նրանցից մեկն իր բարեկամն էր: Խոսքը վերաբերում է 35-ամյա մայոր Քինան Ֆերզաթի մասին, որը Թուրքիայի կողմից աջակցվող «Սիրիայի ազգային բանակի» ստորաբաժանումից էր:

«Քինանը փախել էր պետական բանակից 2012 թվականին եւ միացել ՍԱԲ-ին որպես հրետանու խմբավորման հրամանատար»,-պատմել է նա: «2018 թվականին նա ուղարկվել էր հյուսիսային Սիրիա: Քինանն ուներ երկու տարբերակ՝ կամ ուղեւորվել Իդլիբ եւ միանալ իսլամական ահաբեկչական կազմակերպություններին, կամ Աֆրին եւ միանալ թուրքական ազգային բանակին»: Նա որոշել էր մեկնել Աֆրին եւ միանալ «Սուլթան Մուրադի» դաշինքին, որը գործում է թուրքական ազգային բանակի կազմում, շարունակել է ազգականը՝ պնդելով, որ նրան դիմել են խնդրանքով մեկնել Ադրբեջան, եւ նա վախեցել է մերժել. մեկնել է Ստամբուլ, այնուհետեւ Ադրբեջան: «Դա տխուր նորություն էր ընտանիքի համար»,-խոստովանել է ազգականը: «Մենք հեղափոխականներ ենք եւ ունենք մեր գործը. մենք չենք ցանկանում լինել միջազգային վարձկաններ»:

Նա նաեւ ցույց է տվել լուսանկարներ, որոնցում երեւում են բոլոր երեք տղամարդկանց դեմքերը 20-30 տարեկան, որոնք ենթադրաբար պատկանում են ՍԱԲ-ին, ծնունդով Ռաստանայից են եւ ենթադրաբար մահացել են այս շաբաթ: