Հակառակորդը միայն այսօր ունի մոտ 400 զոհ, գրեթե 700 վիրավոր։ Հայկական կողմը այսօրվա ընթացքում խոցել է ադրբեջանական 13 զրահատեխնիկա, 3 ինքնաթիռ,1 ԱԹՍ։ Այս մասին այսօր, լրագրողների հետ ճեպազրույցի ընթացքում, ամփոփելով օրվա պատկերը, հայտնեց ՀՀ ՊՆ ներկայացուցիչ Արծրուն Հովհաննիսյանը:

Հովհաննիսյանի խոսքով` այս պահին մարտերը շարունակվում են նույն ուղղություններով` հարավային եւ  հյուսիսային։ Համեմատելով նախորդ երկու օրերի հետ` նա նշեց, որ այսօր մարտերը նույնքան համառ եւ ծանր չեն եղել, թեպետ հակառակորդը շարունակել է հարձակողական գործողություններ՝  նույն ուղղություններում՝ նախապես կենտրոնացնելով որոշակի ուժեր, որոնք մեր զինծառայողները հետ են մղել ու պատճառել են թշնամուն զգալի կորուստներ:

Արծրուն հովհաննիսյանը խոսեց ապատեղեկատվության մասին, որը հակառակորդ երկիրը տարածում է ամենաբարձր ղեկավարության մակարդակով, մասնավորապես` Ադրբեջանի նախագահն ու վերջինիս ընտանիքը ։ 

«Մենք բոլոր հիմնավոր կասկածներն ունենք ենթադրելու, որ Ալիեւը սեփական երկրում գտնվում է ինֆորմացիոն բլոկադայի կամ ապատեղեկատվության տիրույթում։ Փաստացի, երկրի գլխավոր գերագույն հրամանատարը չի տիրապետում իրավիճակին, կամ էլ սխալ են զեկուցում»,– նշեց Հովհաննիսյանը:

Նա հավելեց, որ այդ կեղծ ինֆորմացիայից Ալիեւը ոգեւորվում է, ապա  սեփական պարտությունը հաղթանակ ներկայացնելու համար փորձում է էժանագին լուրեր տարածել, որոնք շատ հեշտ հերքվում են։

«Այսօր Գյանջայի` պատմական Գանձակի օդանավակայանին հասցված հարվածից հետո մենք հասկացանք, թե Ալիեւն ինչքան թքած ունի ժողովրդի վրա։ Մեկ շաբաթ է` մարտեր են ընթանում, բայց Ալիեւը ոչ մի քայլ չի ձեռնարկել սեփական բնակչության անվտանգությունն ապահովելու համար»,– նշել է Հովհաննիսյանը։

Արծրուն հովհաննիսյանը եւս մեկ անգամ հայտնեց, որ Ադրբեջանի ինված ուժերը մարտերի փաստացի կառավարումը հանձնված է Թուրքիայի ԶՈւ-ին։ Նա նշեց` Հայաստանի, Արցախի բանակը կռվում է թուրք-ադրբեջանական միացյալ ուժերի դեմ։

«Թուրքական զինված ուժերի ամենագործուն մասնակցությունն այսօր որոշակիորեն չեզոքացվել է։ Թուրքական ԱԹՍ–ները չեն կարողացել աշխատել, կորուստն ու փախուստն ավելի շատ է եղել, դրա համար էլ գրավված քաղաքների մասին լուրերը շատանում են»,-ասաց նա՝ հավելելով, որ Ադրբեջանի ԶՈՒ–ն այսօր որեւէ նշանակալի մարտավարական գործողություն չի կարողացել կատարել, դեռ ավելին՝ հետ է շպրտվել:

Անդրադառնալով ՀՀ տարածքին, Հովհաննիսյանը հայտնեց, որ ՀՀ–ի սահմաններին ակտիվ մարտական գործողություններ չկան, հարաբերական հանգիստ է։ 

«Չեմ կարծում, որ Երեւանը վտանգված է, բայց ամեն դեպքում, մենք պատերազմի մեջ ենք»,– նշեց Հովհաննիսյանը` պատասխանելով այն հարցին, թե արդյոք կարող է նաև մայրաքաղաքին վտանգ սպառնալ։