Գործարար և բարերար Ռուբեն Վարդանյանը հրատապ կոչով դիմել է ՌԴ նախագահ Վլադիմիր Պուտինին և Ռուսաստանի ռազմաքաղաքական վերնախավին՝ խնդրելով չանտեսել այն ամենը, ինչ տեղի է ունենում Արցախում:

«Ես հայկական արմատներ ունեցող ՌԴ քաղաքացի եմ: Ես ցանկանում եմ դիմել շատերին, շատ տարբեր մարդկանց, որոնց ճանաչում եմ կամ չեմ ճանաչում: Ցանկանում եմ, որ բոլորս հասկանանք, որ կանգնած ենք հսկայական անդունդի՝ մարդասիրական և մարդկային ճգնաժամի եզրին: Եվ դա ազգային պարտերազմի հարց չէ: Խորապես վստահ եմ, որ սա մարդկության և մարդկային հիմնարար իրավունքների պաշտպանության հարցն է:

Վլադիմիր Վլադիմիրի, ցանկանում եմ դիմել Ձեզ՝ որպես ՌԴ քաղաքացի: Միշտ փորձել եմ լինել Ռուսաստանի լավ քաղաքացի, անել ամեն ինչ, որ Ռուսաստանը բարգավաճի: Գիտեմ, որ որպես առաջնորդ շատ բան կարող եք անել: Հենց այսօր Ձեր մասնակցությունը, Ձեր վերաբերմունքն այս ամենին շատ բան կարող է բնորոշել: Որպես 3 մլն հայ բնակչության ներկայացուցիչ՝ ցանկանում եմ ասել. «Հավատացեք, որ սա պարզապես ինչ-որ տարածքային հակամարտություն չէ, սա պատերազմ չէ Հայաստանի և Ադրբեջանի միջև: Սա շատ ավելի շուրջ է, և եթե այս ամենն աղետով ավարտվի, դա անբուժելի վերք կլինի Ռուսաստանի համար:

Վլադիմիր Վլադիմիրի, դիմում եմ Ձեզ՝ որպես այն երկրի քաղաքացի, որի առաջնորդը Դուք եք: Խնդրում եմ միջամտեք այս գործընթացին»,- ասել է Վարդանյանը՝ հավելելով, որ դիմում է նաև Ռուսաստանի ռազմաքաղաքական վերնախավին և Ռուսաստանի մտավորականությանը:

Գործարարը դիմել է նաև Հայաստանի ղեկավարությանն ու հայ երիտասարդությանը, ինչպես նաև ողջ աշխարհում բնակվող հայությանը, ինչպես նաև մեր հարևաններին, մասնավորապես՝ վրացիներին: Վերջիններիս նա կոչ է արել այնպես չանել, որ հետագայում ստիպված լինեն ամոթով ապրել:

Վերջում նա դիմել է նաև միջազգային հանրությանը՝ կոչ անելով հերթական անգամ չանտեսել այս փոքր ժողովրդի «փոքր թվացող» խնդիրը, որը վերածվում է աշխարհաքաղաքական մեծ դիմակայության:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։ Հոկտեմբերի 4-ի դրությամբ Արցախի զինուժը խոցել է հակառակորդի՝ 14 ուղղաթիռ, 17 ինքնաթիռ, 124 անօդաչու թռչող սարք, 368 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ: Հակառակորդն ունի ավելի քան 3154 զոհ, ավելի քան 5270 վիրավոր։

Հայկական կողմից, նախնական տվյալներով, կա 230 զոհ և 200-ից ավելի վիրավոր։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում վիրավորվել է 80 քաղաքացիական անձ, զոհվել՝ 19 մարդ, վնասվել՝ մոտ 2700 գույք ու ենթակառուցվածք։ Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։