«ԱրմՆյուզ» հեռուստաալիքի հեռուստամեկնաբան Աբրահամ Գասպարյանը, գտնվելով Արցախում և ներկայացնելով իրավիճակը՝ հարձակման թիրախում հայտնված քաղաքացիական կառույցներից, կոչով դիմել է արտասահմանցի լրագրողներին:

«Եթե լուսաբանեք Լեռնային Ղարաբաղում տեղի ունեցող իրադարձությունները, խնդրում եմ ուշադրություն դարձրեք, թե ինչպիսին են թուրք-ադրբեջանական ագրեսիայի հետևանքները»,- նշում է Աբրահամ Գասպարյանը՝ ցույց տալով, թե ինչ վիճակում է գտնվում դպրոցի շենքը, որը հարձակման թիրախ է դարձել:

«Կույր մի եղեք, քայլ արեք և կանգնեցրեք թուրք-ադրբեջանական ագրեսիան Լեռնային Ղարաբաղի դեմ»,- հավելել է հեռուստամեկնաբանը:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 4-ի դրությամբ Արցախի զինուժը խոցել է հակառակորդի՝ 14 ուղղաթիռ, 17 ինքնաթիռ, 124 անօդաչու թռչող սարք, 368 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 3145 զոհ, ավելի քան 5270 վիրավոր։ Հայկական կողմից, նախնական տվյալներով, կա 209 զոհ և 200-ից ավելի վիրավոր։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում՝ 14 մարդ։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։