Մինսկի խմբի համանախագահ երկրների ԱԳՆ-ները հայտարարություն են տարածել
Ռուսաստանի, Ֆրանսիայի և ԱՄՆ-ի արտաքին քաղաքական գերատեսչությունների ղեկավարները հրապարակել են եռակողմ հայտարարություն Լեռնային Ղարաբաղի իրավիճակի վերաբերյալ։ Այս մասին փոխանցում է РИА «Новости»-ն։
Հայտարարության մեջ նշված է, որ Սերգեյ Լավրովը, Ժան‑Իվ Լե Դրիանը և Մայք Պոմպեոն «վճռականորեն դատապարտում են Լեռնային Ղարաբաղի հակամարտության գոտում և դրա սահմաններից դուրս բռնության աննախադեպ և վտանգավոր էսկալացիան»:
«Վերջին հարձակումները, որոնց նպատակը, ենթադրաբար, քաղաքացիական օբյեկտներն էին, ինչպես շփման գծի երկայնքով, այնպես էլ Հայաստանի և Ադրբեջանի տարածքներում, Լեռնային Ղարաբաղի հակամարտության գոտուց դուրս, ինչպես նաև նման հարձակումների անհամաչափությունը անընդունելի սպառնալիք են տարածաշրջանում կայունության համար»,- ընդգծել են փաստաթղթի հեղինակները։
Վկայակոչելով ԵԱՀԿ Մինսկի խմբի երեք համանախագահ երկրների ղեկավարների հոկտեմբերի 1-ի հայտարարությունը ՝ նախարարները կրկին կողմերին կոչ են արել անհապաղ և առանց նախապայմանների դադարեցնել կրակը։
Ընդգծվում է, որ Ռուսաստանը, Ֆրանսիան և ԱՄՆ-ը կշարունակեն ավելացնել փոխգործակցությունը հակամարտության կողմերի հետ և կոչ են անում նրանց ստանձնել հիմնարար սկզբունքների և միջազգային փաստաթղթերի հիման վրա խաղաղ կարգավորման գործընթացը վերսկսելու պարտավորությունները:
