Ազգային ժողովը արտահերթ նիստին քննարկում է ՀՀ հարկային օրենսգրքում փոփոխություն կատարելու մասին օրենքի նախագիծը, որը ներկայացրեց ՀՀ ֆինանսների փոխնախարար Արման Պողոսյանը:

«Նախագծի նպատակն է ստեղծել հնարավորություն, որպեսզի առևտրային բանկերը և վարկային կազմակերպություններն առանց լրացուցիչ հարկային պարտավորություններ կրելու ֆիզիկական անձանց կարողանան ներել մինչեւ 2020 թվականի օգոստոսի 31-ը անհուսալի ճանաչված վարկերի գծով հաշվարկված տույժերն ու տուգանքները»,- ասաց նա և նշեց, որ պետությունը, ըստ էության, իր վրա է վերցնում այդ բեռի մի մասը՝ ուղիղ խրախուսելով, որ բանկերն ու վարկային կազմակերպությունները գնան այդ քայլին, ներեն տույժերն ու տուգանքները:
 

«Փորձում ենք ժամանակավոր լուծում տալ և նպաստել, որ բանկերը և ֆինանսական կազմակերպությունները, համեմատաբար փոքր ֆինանսական բեռ ստանձնելով, ներեն վարկառու ֆիզիկական անձանց վարկերը և տուգանքները»,-ասաց նա:

«Իմ քայլը» խմբակցության պատգամավոր Բաբկեն Թունյանը պարզաբանեց, որ եթե բանկն ընդառաջ է գնում խնդիրներ ունեցող վարկառուներին, որոնք ունեն անհուսալի պարտքեր և հաշվարկվել են որոշակի տույժեր ու տուգանքներ, և հիմա, եթե բանկը, ինչ-ինչ հանգամանքներ հաշվի առնելով, որոշի ներել տույժերը և տուգանքները, դրանք գործող օրենքով, միևնույնն է, բանկի համար համարվում են եկամուտ և դրա համար շահութահարկ է վճարվում: Բաբկեն Թունյանն ասաց, որ սա հնարավորություն է տալու, որպեսզի բանկերն այդ հարկը չվճարեն:

«Ստացվում է, որ դժվար իրավիճակում հայտնված քաղաքացիներին օգնելու նպատակով, եթե բանկերը ընդառաջ քայլ են կատարում, պետությունը նույնպես քայլ է անում հարկերից ազատում է, վերջնական որոշումը թողնվելու է բանկերի վրա, իրենք են որոշելու ումը ներել»,- ասաց նա և նշեց, որ սա շատ կարևոր և հրատապ նախագիծ է:

Նախագիծը առաջին ընթերցմամբ ընդունվեց միաձայն 98 կողմ ձայնով: