«Մեր զինված ուժերն այս պահին մարտական գործողությունները վարում են, և հաղթանակները տանում են կոնկրետ միայնակ՝ հենվելով միայն մեր ԶՈՒ և մեր ժողովրդի բարձր մարտունակության և մոբիլիզացիոն բացաձակ ցուցանիշների վրա»,- ճեպազրույցի ժամանակ ասել է ՀՀ ՊՆ ներկայացուցիչ Արծրուն Հովհաննիսյանը՝ անդրադառնալով արտասահմանյան լրատվամիջոցներից մեկի ներկայացուցչի այն հարցին, թե ովքեր են օգնում Հայաստանին ու Արցախին այս պատերազմում:

Հովհաննիսյանն ընդգծել է, որ ընդամենը 48 ժամվա ընթացքում տասնյակ հազարավոր հայեր, կամավոր, չնայելով իրենց տարիքին, կամավորական խմբեր են կազմել և մարտի դաշտ շտապել: Նաև հենց այդ մարդկանց շնորհիվ են այսօր հաղթանակները ձեռք բերվում:

«Այո՛, մենք ունենք դաշնակիցներ, բայց նրանք մարտադաշտում չեն, որովհետև մենք նրանց կարիքը չունենք, մենք ինքնուրույն մեր մարտական գործողությունները վարում ենք, և հաղթանակները տանում ենք»,- հավելել է Հովհաննիսյանը: