Ագրեսիվ հռետորաբանությունը չի օգնի Լեռնային Ղարաբաղի հակամարտության կարգավորմանը: Անհրաժեշտ է ձեռնարկել կոնկրետ քայլեր, որոնք ուղղված կլինեն տարածաշրջանում լարվածության թուլացմանը: Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան, փոխանցում է ՏԱՍՍ-ը:

«Որևէ ագրեսիվ հայտարարություն երբեք չի հանգեցնի փնտրվող արդյունքի, եթե իսկապես մենք ցանկանում ենք հասնել Լեռնային Ղարաբաղում լարվածության թուլացմանը»,-ասել է նա:

Զախարովային խոսքերով, հակամարտության հաջող կարգավորման համար պետք է նախապատվությունը տալ կոնկրետ գործողություններին, ոչ թե՝ թշնամական հռետորաբանությանը:

«Եթե ագրեսիվ հայտարարությունները կարողանային լուծել հակամարտությունը, հավանաբար, ամեն ինչ ավելի հեշտ կլիներ, խնդիրներ չէին լինի: Սակայն հարցն այն է, որ դրանք ոչ միայն չեն նպաստում խնդրի լուծմանը, այլ նաև ավելի են խորացնում իրավիճակը»,-հավելել է նա: