Լրագրողների պաշտպանության կոմիտեն կոչ է արել ապահովել ԶԼՄ-ների ներկայացուցիչների անվտանգությունը ԼՂ-ում
Հայաստանի եւ Ադրբեջանի իշխանությունները պետք է ապահովեն Լեռնային Ղարաբաղում հակամարտությունը լուսաբանող լրագրողների անվտանգությունը եւ նրանց թույլ տան ազատորեն լուսաբանել իրադարձությունները, այսօր հայտարարել է Լրագրողների պաշտպանության կոմիտեն։
«Լեռնային Ղարաբաղի հակամարտության գոտում պատերազմող կողմերը պետք է հարգեն իրադարձությունները ազատորեն լուսաբանելու լրագրողների իրավունքը եւ ձեռնարկեն բոլոր անհրաժեշտ միջոցառումները նրանց անվտանգության ապահովման համար»,- հայտարարել է Եվրոպայի եւ Կենտրոնական Ասիայի CPJ ծրագրի համակարգող Գուլմոզա Սաիդը։ «Ե՛վ Ադրբեջանը, ե՛ւ Հայաստանը պետք է վերջին հարձակման հետաքննություն անցկացնեն, որի հետեւանքով վիրավորվել է 2 լրագրող, եւ պետք է մամուլին հավատարմագրում տրամադրեն ազատ ու անկողմնակալ կերպով»։
Հիշեցնենք, որ նախօրեին ադրբեջանական ԶՈՒ-ն հարվածներ էր հասցրել Շուշիի Ղազանչեցոց եկեղեցուն։ Ավելին՝ երբ օտարերկրյա լրագրողները փորձել են նկարահանել հարվածի հետեւանքները, ադրբեջանական կողմը երկրորդ անգամ է գնդակոծել եկեղեցին, ինչի հետեւանքով լրագրողները վիրավորվել են։ Նրանցից մեկի վիճակը ծանր է։
