Պարսից ծոցի արաբական պետությունների համագործակցության խորհրդի երկրները Ադրբեջանին եւ Հայաստանին կրակը դադարեցնելու եւ համընդգրկուն բանակցություններ սկսելու կոչ են արել։

«Պարսից ծոցի արաբական պետությունների համագործակցության խորհրդի երկրները խորապես մտահոգված են Լեռնային Ղարաբաղի տարածաշրջանի պատճառով երկու հարեւան պետությունների՝ Ադրբեջանի եւ Հայաստանի միջեւ շարունակվող պատերազմով եւ խոր ափսոսանք են հայտնում երկու կողմերից զոհերի ու վիրավորների կապակցությամբ։

Խորհրդի գլխավոր քարտուղար Նաիֆ Ֆալահ Մուբարաք ալ Հաջրաֆը հայտարարել է, որ Համագործակցության խորհուրդը Ադրբեջանին եւ Հայաստանին կրակը դադարեցնելու եւ համընդգրկուն բանակցություններ սկսելու կոչ է արել՝ Անվտանգության խորհրդի բանաձեւերի ու միջազգային իրավունքի նորմերի համաձայն համընդգրկուն քաղաքական լուծման հասնելու համար։ Այս հակամարտությունը սպառնում է Կովկասյան տարածաշրջանի եւ միջազգային աշխարհի անվտանգությանն ու կայունությանը։

Նա ՄԱԿ Անվտանգության խորհրդին կոչ է արել անհապաղ կատարել կրակի դադարեցման իր պարտականությունը եւ ջանքեր ներդնել հակամարտության քաղաքական լուծմանը հասնելու, քաղաքացիական բնակչությանը կյանքը պաշտպանելու եւ աշխարհի այս զգայուն տարածաշրջանում անվտանգությունն ու խաղաղությունը ապահովելու համար»,- նշված է հայտարարության մեջ։