Մոսկվայում Հայաստանի և Ադրբեջանի ԱԳ նախարարների միջև հրադադարի վերաբերյալ պայմանավորվածությունը կդառնա առաջին քայլը Ղարաբաղում երկար հրադադարի հաստատման ճանապարհին: Այսպես կարծում է Եվրասիայում հակամարտությունների կարգավորման հարցերով ԱՄՆ նախկին հատուկ ներկայացուցիչ Քերի Քավանոն, փոխանցում է ՌԻԱ Նովոստին:

Նա կրակի դադարեցումն անվանել է «շատ ոգևորիչ քայլ»:

«Այս հրադադարը կարող է դառնալ պայմանական, հաջորդ քայլն ավելի լայն դիսկուսիան է այն մասին, թե ինչպես պետք է պահպանել իրական, ավելի մշտական հրադադարը»,-ասել է Քավանոն ՌԻԱ Նովոստիի հետ զրույցում:

Նշենք, որ ամերիկացի դիվանագետը 2000-ականների սկզբներին կարևոր դերակատարում ուներ հակամարտության կարգավորման գործընթացում:

«Սա դեպի համաձայնագիրը առաջին քայլն է, սակայն հաջորդ համաձայնագրերը չեն բերելու հակամարտության կարգավորմանը, սա կլինի շարունակական հրադադար»,-հավելել է նա:

Քավանոն հույս է հայտնել, որ հաջորդ շաբաթ Մոսկվայում կսկսեն ավելի «կենդանի» բանակցություններ: Նա հույս ունի, որ ժամանակի ընթացքում հնարավոր կլինի կենտրոնանալ ոչ միայն հրադադարի, այլ նաև հակամարտության բուն կարգավորման գործընթացի վրա:

«Դա արագ չի լինի: Շատ դժվար է փոխզիջումային որոշում գտնել այսքան ինտենսիվ մարտական գործողություններից հետո»,-ասել է Ղարաբաղի հարցով նախկին բանակցողը: