Հայաստանը և Ռուսաստանը կսկսեն փորձնական երկկողմ նախագիծ քաղաքացիների թռիչքների համար՝ փոխանակելով ժամանող ուղևորների կորոնավիրուսի թեստերի արդյունքները։

Հայաստանում և Ռուսաստանում հավատարմագրված լաբորատորիաների կողմից թեստավորման բացասական պատասխանի դեպքում անձի մուտքը մյուս երկիր կթույլատրվի։

Լաբորատորիաների թեստավորման պատասխանները կփոխանցվեն երկու երկրների սահմանային անցակետերին թվային պլատֆորմի միջոցով, որի ստեղծման աշխատանքներն ավարտին մոտ են։

Աշխատանքային մակարդակում այս պայմանավորվածության ձեռքբերման մասին Sputnik Արմենիայի թղթակցին ասել է Հայաստանի փոխվարչապետ Մհեր Գրիգորյանը՝ մեկնաբանելով Եվրասիական միջկառավարական խորհրդի նիստում ընդունված որոշումներից մեկը:

«Սկզբում Հայաստանի և Ռուսաստանի միջև տվյալների փոխանակումը կիրականացվի փորձնական ռեժիմով, բայց դրա արդյունքները կներկայացվեն Եվրասիական միության այլ գործընկերներին եւս», - շեշտել է Գրիգորյանը:

Գործարկվելու դեպքում սա կհեշտացնի ՀՀ քաղաքացիների մեկնումը ՌԴ, բնականաբար՝ թեստի բացասական պատասխանի դեպքում։

Կորոնավիրուսի համաճարակի պատճառով Հայաստանի քաղաքացիների մեկնումը Ռուսաստան դեռ սահմանափակ է: