«Հոկտեմբերի 9-ին Մոսկվայում ՌԴ, ՀՀ և Ադրբեջանի նախագահների  միջև հրադադարի պայմանավորվածությունը հակառակորդը բազմիցս խախտել է: Մենք ակնկալում ենք  քաղաքակիրթ աշխարհի օժանդակությունը տարածաշրջան միջազգային տեռորիմի թափանցելու դեմ, և դա՝ ոչ միայն կոչերով»,- մամուլի ասուլիսի ընթացքում ասել է Արցախի նախագահ Արայիկ Հարությունյանը:

Նա հիշեցրել է, որ Արցախի ազատագրական պայքարի դեմ կռվում են միջազգային ահաբեկիչները: «Սմերչ», «Պոլոնեզ» ԱԹՍ. Ադրբեջանը խաղաղ  բնակչության և քաղաքացիական ենթակառուցվածքների դեմ այդպիսի զինատեսակներ է օգտագործում: «Ստեփանակերտում չկա տեղ, որտեղ մի քանի անգամ պայթած չլինեն այդ արկերը,-նշել է Արցախի նախագահը և ավելացրել, որ Ադրբեջանի կողմից ոտնահարվում են համամարդկային արժեքները, ընթանում է  բնակչության  բնաջնջման գործընթաց:

«Այսքանից  հետո  առաջարկում են Արցախի բնակչությանը իրենց կողմից առաջադրված պայմաններ»,-ասել է նա՝ նշելով, որ Արցախը Հայաստանի և Սփյուռքի  օժանդակությամբ իրականացնում է իր ինքապաշտպանության իրավունքը:

«Արցախը չի լինելու Ադրբեջանի մաս»,-ընդգծել է Ա. Հարությունյանը:

Նա հայտնել է, որ եթե Ադրբեջանը առաջիկա մեկ -երկու օրում չպահպանի հրադադարի պահանջները, Արցախը դիմելու է Հայաստանի իշխանություններին, միջագային հանրությանը և աշխարհի բոլոր երկրներին՝ Արցախի անկախությունը  ճանաչելու համար:

Հարությունյանը նշել է, որ  առավոտից իրադրությունը համեմատաբար հանգիստ է, առաջնագծում շատ փոքր հրաձգություններ են, կիրառվում է սովորական հրետանի. մինչդեռ երեկ հրադադար չի եղել: