Հայաստանի հրեական համայնքի նախագահ Ռիմա Վարժապետյանը  վստահ է՝ միանշաակ, դատապարտելի է այն փաստը, որ Իսրայելը զենք է մատակարարում Ադրբեջանին անգամ այս օրերին, երբ հրադադար է հայտարարվել։

«Ադրբեջանին զենք  տրամադրելը շատ վատ ու վտանգավոր երևույթ է, և մենք, բնականաբար, դեմ ենք դրան, չենք ընդունում դա։ Մենք հայ ժողովրդի կողքին ենք։ Բանավոր և գրավոր դիմել ենք Իսրայելի ղեկավարությանը՝  այս կապակցությամբ,  բայց դեռ պատասխան չենք ստացել», —  MegaNews.am-ի թղթակցի հետ զրույցում նշեց Ռիմա Վարժապետյանը։

Հայաստանի հրեական համայնքի փոխնախագահ Կարեն Հովհաննիսյանն էլ մեր թղթակցի հետ զրույցում նշեց՝ շատ ծանր է տանում այն, ինչ կատարվում է այս օրերին։ 

«Ես շատ բացասաբար եմ վերաբերում այս երևույթին, ես կարծում եմ, որ հրադադարի ժամանակ, երբ ռազմական գործողությունները դադարեցվում են, չի կարելի զենք վաճառել Ադրբեջանին ու  փող աշխատել», —  ասաց Կարեն հովհաննիսյանը՝ անդրադառնալով Իսրայելի կողմից Ադրբեջանին այս օրերին զենքի մատակարարման փաստին։

Կարեն Հովհաննիսյանը նշեց՝  հասկանալի է, որ Ռուսաստանն ու Բելառուսն էլ են զենք վաճառել նախկինում, բայց ո՛չ հրադադադարի օրեին․ հրադադարի օրերին այդ երկրները նման բան չեն անում, իսկ Իսրայելն այս օրերին էլ է զենք մատակարարում․ դա, միանշանակ, դատապարտելի է։

«Հրեա ժողովուրդը  չի ուզում, որ Իսրայելը զոնք մատակարարի Ադրբեջանին։ Ես հաստատ գիտեմ, որ  հրեա ժողովուրդը դեմ է դրան, դա Իսրայելի ղեկավարների որոշումն է։ Իսրայելը նավթի մոտ 40 տոկոսն Ադրբեջանից  է ստանում, հետո՝ Պարսկաստանի հարցը կա․ այսպիսի շատ հարցեր  կան, բայց բոլոր դեպքերում, մի բան հաստատ է․ երբ հրադադար է հայտարարվել ու, այդուհանդերձ, Իսրայելը զենք է մատակարարում Ադրբեջանին, դա միանշանակ, դատապարտելի է», —  ասաց Կարեն Հովհաննիսյանը։

Կարեն Հովհաննիսյանը ևս նշեց՝ Հայաստանի  հրեական համայնքը նամակով դիմել է Իսրայելի ղեկավարությանը՝ խնդրելով դադարեցնել զենքի մատակարարումն Ադրբեջանին։
Նա շեշտեց՝ Հայաստանում հրեաներին երբեք  որևէ դեպքում խտրական վերաբերմունք չեն ցուցաբերել
«Իսկ այդ երևույթները, որոնք հիմա մենք տեսնում ենք, կարող են  սրել հրեաների և հայերի հարաբերությունները, իսկ  դա ոչ մեկին պետք չէ՝  ո՛չ հայ ժողովրդին, ո՛չ հրեա ժողովրդին», —  եզրափակեց Կարեն Հովհաննիսյանը։

Հիշեցնենք՝ սեպտեմբերի 27-ից Ադրբեջանի զինուժը՝ Թուրքիայի գործուն աջակցությամբ, ահաբեկիչներին ռազմական գործողություններում ներգրավելով լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։ Ռազմական գործողությունների ընթացքում հրետակոծվել են  նաև Հայաստանի վարչական տարածքում գտնվող համայնքներ։ Հոկտեմբերի 10-ից` ժամը 12:00-ից, կողմերի համաձայնությամբ հրադադար  է հաստատվել մարդասիրական նկատառումներով` ռազմագերիների փոխանակման և զոհերի մարմինների դուրսբերման նպատակով։ Իսրայելը այժմ էլ՝ չնայած հրադադարի հաստատմանը,  Ադրբեջանին հարձակողական զենք է վաճառում, որն օգտագործվում է Արցախի խաղաղ բնակչության դեմ։

Արցախի նախագահ Արայիկ Հարությունյանն այսօր մամուլի ասուլիսի ընթացքում անդրադարձել է  վերոնշյալ փաստին՝ նշելով․ «Ապրիլյան պատերազմի ժամանակ ոչ միայն Իսրայելի իշխանությունը տեղյակ էր, որ դա օգտագործվում է ոչ թե պաշտպանության, այլ հարձակողական նպատակով, այլև Իսրայելից եկած մասնագետներն էին այն ժամանակ դրանք օգտագործում։ Դրա համար երբ Իսրայելի իշխանությունն ասաց՝ տեղյակ չենք, դա հերթական ծաղրանքն է մարդկության հանդեպ։ Իհարկե, տեղյակ են և այսօր շարունակում են մատակարարել, և  այս ցեղասպանության համար պատասխանատու է նաև Իսրայելի իշխանությունը»։

Հասմիկ Սարգսյան