Ստրասբուրգում ընթանում է Եվրոպայի խորհրդի խորհրդարանական վեհաժողովի ընդլայնված նիստը` տեսակոնֆերանսի ձևաչափով: Նիստի օրակարգին ավելացվել է Հայաստանի և Ադրբեջանի միջև զինված հակամարտության թեմայի քննարկումը: ՀՀ ԱԺ պատգամավոր Միքայել Մելքումյանն իր ելույթում առաջարկել է ստեղծել միջազգային հակաահաբեկչական կոալիցիա:

«Լեռնային Ղարաբաղում քաղաքացիական բնակչությունը, ծերերը, կանայք, երեխաները իրենց սեփական տներում դառնում են ռմբակոծությունների զոհ: Ավերվում են քաղաքացիական ենթակառուցվածքները: Հարց է ծագում՝ կարո՞ղ ենք կանգնեցնել Ադրբեջանի այս բարբարոսական, ահաբեկչական ագրեսիան՝ Թուրքիայի ուղղակի մասնակցությամբ: Շուշիի Սուրբ Ղազանչեցոց եկեղեցին նույնպես ավերվել է: Դա սարսափելի բարբարոսություն է: Խոսքը միջազգային բազմաթիվ կոնվենցիաների խախտման մասին է: Եվրոպան տեսնում է, որ Արցախում պատերազմ է: Թուրքիան առաջին անգամ է մասնակցում Արցախի ժողովրդի դեմ պատերազմի: Մենք այժմ Արցախի հետ շփման գծում տեսնում ենք հազարավոր միջազգային ահաբեկիչների, որոնց բերել են Սիրիայից: Մենք ունենք ապացույցներ: Բոլորս էլ դեմ ենք միջազգային ահաբեկչությանը: Եկե՛ք ստեղծենք միջազգային կոալիցիա ահաբեկչության դեմ, որպեսզի վերջ դնենք ահաբեկչություններին»,- ասել է Միքայել Մելքումյանը: