168․am-ը արդեն տեղեկացրել է, որ այսօր Կառավարությունում ՀՀ վարչապետ Նիկոլ Փաշինյանը հանդիպել է արտախորհրդարանական քաղաքական ուժերի հետ: Հանդիպմանը մասնակցել են նախկին իշխող ուժի՝ «Հանրապետական» կուսակցության ԳՄ անդամ Էդուարդ Շարմազանովը, ՀՅԴ Գերագույն մարմնի ներկայացուցիչ Իշխան Սաղաթելյանը, առաջին նախագահ Լևոն Տեր-Պետրոսյանի ղեկավարած «Հայ ազգային կոնգրես»-ի փոխնախագահ Լևոն Զուրաբյանը, «Հանուն հանրապետության» կուսակցության ղեկավար Արման Բաբաջանյանը, «Հանրապետություն» կուսակցության ղեկավար Արամ Սարգսյանը, «Քաղաքացու որոշում» կուսակցության գործադիր մարմնի քարտուղար Սուրեն Սահակյանը։

Հանդիպման վերաբերյալ փորձեցինք մանրամասներ իմանալ ՀՀԿ ԳՄ անդամ Էդուարդ Շարմազանովից, սակայն, նա հրաժարվեց այդ թեմայով հարցազրույց տալ։ Այնուամենայնիվ, փորձեցինք գոնե մեկ հարցի պատասխան ստանալ․

– Պարոն Շարմազանով, գոնե կնշե՞ք՝ հիմնականում ինչ է քննարկվել հանդիպմանը։

– Պատերազմական իրավիճակի պատճառների շուրջ մեր գնահատականները հստակ տվել ենք, բայց հաշվի առնելով այն հանգամանքը, որ ռազմական դրություն է, չենք կարող գաղտնազերծել և մանրամասներ հաղորդել հանդիպման վերաբերյալ։

– Շատ լավ, միայն մեկ ճշտում․ արդյո՞ք հանդիպման մասնակից քաղաքական ուժերի և վարչապետի դիրքորոշումը Արցախի հարցում նույնն են եղել։

– Ես բոլորի փոխարեն չեմ կարող ասել, բայց, բնականաբար, ո՛չ։ Առնվազն ՀՀԿ-ն 2․5 տարի շարունակ քննադատել է իշխող քաղաքական ուժի գործունեությունը Արցախի հարցում․ այսօր էլ մեր կարծիքները, գնահատականները տարբեր են։ Կներեք, բայց ավել մանրամասներ չեմ կարող ասել, ընդամենը կարող եմ ասել, որ կան տարբեր կարծիքներ։ Կոնկրետ «Հանրապետականի» կարծիքը Արցախի հարցում չի համընկել և չի համընկնում իշխանությունների կարծիքի հետ։ Այսքանը, կներեք, բայց ավելին չեմ կարող ասել