«Հակառակորդը որևէ էական առաջխաղացում չունի, չնայած նրան, որ վերջին մի քանի օրերի ընթացքում Ադրբեջանի ԶՈՒ-ն որդեգրել է հետևյալ քաղաքականությունը՝ հետախուզադիվերսիոն գործողություններով մերձռազմաճակատային տարբեր բնակավայրերում արագ ներթափանցումներ և տեղեկատվական ակցիաներ իրականացնել՝ դրոշներ պարզել տարբեր շենքերի վրա, ապա նկարվել, որպեսզի հոգեբանական ազդեցություն թողնի՝ առաջին հերթին իրենց հասարակության վրա, հետո՝ մեր հասարակության»,- այսօր տեղի ունեցած մամուլի ասուլիսում ասել է ՊՆ ներկայացուցիչ Արծրուն Հովհաննիսյանը:

«Երկարաժամկետ մարտական գործողությունների ընթացքում, կոտրելով զինված ուժերի մեծ ներուժը, հարձակողական գործողություննեի ընթացքում էական հաջողություններ չունենալով, Ադրբեջանը հասարակությանը պետք է կերակրեր նման տեղեկատվություններով»,- պարզաբանել է նա՝ հավելելով, որ 14-15 օրվա ընթացքում մեկ գնդի առաջիկա խնդրի ծավալով առաջխաղացում ապահոված ադրբեջանական 3-4 բանակային կորպուսները մեծ հաշվով մեծ գովելու բան չունեն: «Ուստի ոչինչ չի մնում, քան այն, որ դիվերսիոն խմբերն արագ ներթափանցումներ կատարեն տարբեր բնակավայրեր, նկարվեն տարբեր շինությունների մոտ և ներկայացնեն այս կան այն գյուղի քաղաքապետարան կամ գյուղապետարան»,- ասել է Արծրուն Հովհաննիսյանը: