Եվրամիությունն Առևտրի համաշխարհային կազմակերպությունից թույլտվություն է ստացել՝ սահմանելու տուգանային մաքսատուրքեր ԱՄՆ-ից ներկրվող ապրանքների նկատմամբ։ Խոսքը վերաբերում է տարեկան 3․4 մլրդ եվրո ծավալով ապրանքներին։ Այս մասին հայտնում է Deutsche Welle-ն։

Առևտրի համաշխարհային կազմակերպության հայտարարության մեջ նշված է, որ դա ադեկվատ միջոցառում է այն անբարենպաստ էֆեկտներին, որոնք առաջացել են ամերիկյան Boeing ավիակոնցեռնին ԱՄՆ իշխանոթյունների անօրինական սուբսիդավորման արդյունքում։

Boeing կորպորացիային և դրա եվրոպական մրցակից Airbus-ին տրամադրվող պետական օգնության շուրջ վեճը շարունակվում է ավելի քան 16 տարի։ Ադյունքում ԱՀԿ-ն սուբսիդավորումների մի մասն անթույլատրելի է համարել ավիաշինական երկու ընկերությունների համար էլ։ 2019-ին կազմակերպությունը թույլ էր տվել ԱՄՆ-ին մոտ 7․5 մլրդ եվրոյի մաքսատուրքեր գանձել եվրոպական ապրանքների և ծառայությունների դիմաց։ Դրա ազդեցությունը տարածվել էր Airbus- ի ինքնաթիռների, ինչպես նաև ձիթապտղի բուսայուղի, պանրի և գինու վրա։