Հուսանք, որ դատարանը վեր կգտնվի ամեն ինչից և Ծառուկյանը կլինի ազատության մեջ, որպեսզի կկարողանա իր միջազգային կապերով ու տիրապետած ռեսուրսներով օգնել մեր հայրենիքին ու զինվորներին․ Ծառուկյանի պաշտպան

 

Հոկտեմբերի 19-ին տեղի է ունենալու ԲՀԿ առաջնորդ Գագիկ Ծառուկյանի գործով դատական նիստը: Ծառուկյանի փաստաբանները պատրաստվում են դատարանին միջնորդություն ներկայացնել՝ գրավի դիմաց նրան ազատելու համար: Այս օրերին բազաթիվ հասարակական, քաղաքական գործիչներ ու քաղաքացիներ հույս են հայտնում, որ  հաշվի առնելով պատերազմական դրությունը՝  դատական իշխանությունները Ծառուկյանին կազատեն կալանքից, քանի որ   Ծառուկյանը հզոր կապեր ունի ոչ միայն մեր երկրում, այլև միջազգային հարթակներում և, բնականաբար, գտնվելով ազատության մեջ՝  նա կարող է ի նպաստ Արցախի և Հայաստանի՝ ակտիվ գործունեություն ծավալել։ Անգամ անազատության մեջ  գտնվելով՝ Ծառուկյանը շարունակում է լինել մեր  բանակի ու ժողովրդի կողքին։ Այս օրերին Ծառուկյանների ընտանիքը աջակցում է մեր բանակին  ու հայրենակիցներին։

Գագիկ Ծառուկանի պաշտպան Սմբատ Մինասյանը MegaNews.am-ի թղթակցի հետ զրույցում նշեց՝  եթե ուրիշ դատավոր լիներ, հնարավոր էր շատ մեծ հույսեր ունենալ, որ դատարանը Ծառուկյանին գրավի դիմաց ազատելու որոշում կկայացնի, բայց  դատավոր Մնացական Մարտիրոսյանի դեպքում բավական դժվար է դրան հավատալ։ 

Հարցին՝ իսկ եթե հոկտեմբերի 19-ին դատավոր Մնացական Մարտիրոսյանի նախագահությամբ՝ դատարանը դարձյալ որոշի, որ Ծառուկյանը պետք  է շարունակի մնալ անազատության մեջ,  ո՞րն է լինելու  Ծառուկյանի պաշտպանական  խմբի հաջորդ քայլը, Սմբատ Մինասյանը պատասխանեց․ «Որոշումը կբողոքարկենք վերաքննաիչ դատարան՝ հույս ունենալով, որ վերաքննիչ դատարանը, այնուամենայնիվ, ավելի հումանիստ կգտնվի և ռազմական դրության պայմաններում   գրավի դիմաց  կազատի Ծառուկյանին, որպեսզի Ծառուկյանը կարողանա այս  օրերին  հանուն մեր հայրենիքի ակտիվ ու արդյունավետ գործունեություն ծավալել»։

Ծառուկյանի պաշտպանական թիմի անդամ, փաստաբան Էմին խաչատրյանն էլ մեր թղթակցի հետ զրույցում նշեց՝ ակնկալում է, որ դատարանը հիմա վեր կգտնվի ամեն ինչից և կկայացնի պատճատաբանված, օբյեկտիվ որոշում՝  հաշվի առելով  երկրում ստեղծված իրավիճակը, այն հանգամանքը, որ հիմա օրվա հրամայական է, որ  Գագիկ Ծառուկյանը գտնվի ազատության մեջ։ Պաշտպանի խոսքով՝ մի բան հաստատ և ակնհայտ է՝  գտնվելով ազատության մեջ՝ Ծառուկյանը որևէ   կերպ չի խոչնդոտի գործի քննությանը․  ըստ էության,  որևէ հիմք չկա նման բան ենթադրելու համար։

«Այս դատական ակտերի վերաբերյալ մենք արդեն իսկ մեր դիրքորոշումը ներկայացրել ենք․ 4 ամիս  ազատության մեջ գտնվելով՝ պարոն Ծառուկյանը  որևէ ոչ իրավաչափ գործունեություն իրեն թույլ չի տվել, և  ի պատասխան պաշտպանական խմբի կողմից դատարանին ուղղված հարցերին՝  վարույթ իրականացնող մարմինը ևս  հաստատել է  մեր պնդումը, այն է՝ պարոն Ծառուկյանը,  4 ամիս ազատության մեջ գտնվելով, ոչ պատշաճ վարքագիծ  չի դրսևորել և ավելին՝ իր գործողություններով հնարավորինս աջակցել  է գործի քննությանը։ Հույս ունեմ, որ այս պայմաններում դատարանը կբավարարի միջնորդությունը, գրավի ողջամիտ ու թույլատրելի չափ կսահմանի։ Այս պահին մնում է ակնկալել,  որ ամեն դեպքում դատարանն ամեն ինչից վեր կգտնվի», —   ասաց Էմին Խաչատրյանը։

Հարցին՝ իսկ այն փաստը, որ դատական նիստը տեղի է ունենալու դատավոր Մարտիրոսյանի նախագահությամբ, կասկած չի՞ ներշնչում, որ, գուցե, այս անգամ էլ որոշում ընդունվի, որ Ծառուկյանը պետք  է շարունակի անազատության մեջ մնալ, Էմին Խաչատրյանը պատասխանեց․ «Նախորդ դատական նիստի ժամանակ, երբ ինքն էր նիստը նախագահում, մենք ինքնաբացարկի միջնորդություն ներկայացրինք, բայց այս պահին կրկին իրեն է մակագրվել, կրկին ինքն է նիստը նախագահելու։ Հույս ունենանք, որ այս  անգամ նման վերաբերմունք չի  ցուցաբերի, ինչպես  նախկինում․ հաշվի առնենք նաև այն հանգամանքը, որ այն ժամանակ, երբ ինքը նիստը նախագահում էր,  երկրում դեռ ռազմական դրություն չկար ու երկրի իրավիճակն այսպես օրհասական ու ծանր չէր»։

Երեկ՝ հոկտեմբերի 13-ին, Գագիկ Ծառուկյանի փաստաբան Երեմ Սարգսյանն իր ֆեյսբուքյան էջում գրել էր՝ մարդու իրավունքների պաշտպանը այցելել է ՀՀ ԱՆ «Երևան-Կենտրոն» քրեակատարողական հիմնարկ և տեսակցել Գագիկ Ծառուկյանին, որից հետո բարձրաձայնված անօրինականությունների կապակցությամբ գրավոր դիմել է ՀՀ գլխավոր դատախազին, որպեսզի օրենքով դատախազությանը վերապահված իրավասության շրջանակում քննարկման առարկա դարձվեն գրության մեջ ներկայացված բոլոր հանգամանքները, այդ թվում՝ ընտրված խափանման միջոցի հիմնավորվածության հարցը։ ՀՀ գլխավոր դատախազությունից դեռևս պատասխան չի ստացվել։

Հարցին՝ պաշանական թիմն ակնկալիքներ ունի՞, որ ՄԻՊ-ի այս քայլը ևս կարող է նպաստել, որ Ծառուկյանը ազատության մեջ հայտնվի, Էմին Խաչատրյանը պատասխանեց․ «Այս պարագայում  ցանկացած  նման  քայլ կարող է նպաստել, որպեսզի օրինակություն  հաստատվի, հիշեցնեմ՝ բացի ՄԻՊ-ի կողմից ուղարկված դիմումը՝  14 կուսակցություն գլխավոր դատախազին ուղղված դրավոր դիմում  է հղել։ ԼՀԿ նախագահ Էդմոն Մարուքյանը ևս  Ծառուկյանի հետ կապված՝ ՀՀ գլխավոր դատախազին դիմել․․․ Հույս ունենք, որ, իսկապես, այս գործի հետ կապված՝ օրինականություն կհաստատվի և պարոն Ծառուկյանը կգտնվի  ազատության մեջ ու իր ունեցած հնարավորություններով, միջազգային կապերով,  իր տիրապետած ռեսուրսներով կաջակցի  ԱՀ-ին, ՀՀ-ին, մեր զինվորներին»։

Հիշեցնենք՝ ԲՀԿ առաջնորդ  Գագիկ Ծառուկյանը կալանավորվել է  սեպտեմբերի 25-ին։ Նա մեղադրվում է 2017-ի խորհրդարանական ընտրությունների ժամանակ ընտրակաշառք տալը կազմակերպելու համար, սակայն մեղադրանքը չի ընդունում և հայտարարել է, որ ինքը քաղաքական հետապնդման է ենթարկվում:

Հասմիկ Սարգսյան