ԵԱՀԿ ՄԽ բոլոր համանախագահ երկրները խոսել են Ղարաբաղյան հակամարտության գոտում ահաբեկիչների գտնվելու մասին: Այս մասին այսօր մամուլի ասուլիսի ժամանակ հայտարարեց ՀՀ վարչապետի խորհրդական Վաղարշակ Հարությունյանը:

Խոսքը մասնավորապես վերաբերում է ՌԴ արտաքին հետախուզության տնօրեն Նարիշկինի հայտարարությանը, Թուրքիայի նախագահի հետ հեռախոսազրույցում ՌԴ նախագահ Վլադիմիր Պուտինի կողմից անհանգստություն հայտնելուն, Ֆրանսիայի նախագահի հայտարարություններին ու ԱՄՆ պետքարտուղար Մայք Պոմպեոյի խոսքերին, որ Թուրքիան այդ մարդկանցով ապահովում է Ադրբեջանին. «Էլ չեմ խոսում այլ պետություններից հայտարարությունների, տարբեր տեսանյութերի մասին»:

Հարությունյանը հայտարարեց, որ Ադրբեջանն ահաբեկիչների հետ իր համագործակցությունը սկսել է դեռ 1992-94 թվականներին:

Ասուլիսի ժամանակ Հարությունյանը փաստաթուղթ ցույց տվեց, որն ապացուցում է, որ Ադրբեջանի գլխավոր շտաբի պետը ստորագրել է մի փաստաթուղթ, որի համաձայն 520 հոգի ներգրավվում են զորամաս ու մասնակցում մարտական գործողություններին. «Դրանից հետո հրաման կա, որ զորակոչեն պահեստազորի այն սպաներին, ովքեր տիրապետում են ֆարսի լեզվին։

Կան կոնկրետ 15 ազգանուններ, ովքեր զորակոչվել են: Դա խոսում է այն մասին, որ Ադրբեջանն ահաբեկիչների հետ համագործակցությունը սկսել է դեռ 1992 թվականից ու դա շարունակում է մինչ այսօր, ինչը սպառնալիք է ողջ տարածաշրջանի համար»: