Հրեա ուսանողների համաշխարհային միությունը (World Union of Jewish Students) հայտարարությամբ Իսրայելի կառավարությանը կոչ է արել դադարեցնել զենքի վաճառքը Ադրբեջանին, քանի դեռ հակամարտությունը Ղարաբաղում շարունակվում է:

Փոխարենը՝ ուսանողներն իրենց կառավարությանն առաջարկում են հանդես գալ որպես միջնորդ:

World Union of Jewish Students (WUJS) միջազգային կազմակերպություն է, որն աջակցում է անկախ հրեա ուսանողական միություններին աշխարհում:

 «Ադրբեջանը, Թուրքիայի ռազմական աջակցությամբ, հարձակվել է Լեռնային Ղարաբաղի ժողովրդի վրա: Ավելին, նախագահ Էրդողանի ագրեսիվ հակահայկական հռետորաբանությունը եւ Ադրբեջանին ռազմական եւ քաղաքական հետագա օժանդակության բազմիցս հնչող խոստումները գոյաբանական սպառնալիք են հանդիսանում Լեռնային Ղարաբաղի ժողովրդի եւ Հայաստանի բնակչության համար»,- ասված է հայտարարության մեջ:

 2018 թվականին WUJS ճանաչել էր Հայոց ցեղասպանությունը եւ Իսրայելի կառավարությանը կոչ էր արել պաշտոնապես ճանաչել հայերի, Պոնտոսի հույների եւ ասորիների 1915-1923 թթ. ցեղասպանությունները: