«Պատերազմի սկսվելուն զուգընթաց թշնամին նաև մեր տարածքում փորձեց ԱԹՍ-ներով որոշ տեղերում իրականացնել հիրթիռակոծման աշխատանքներ, ինչի արդյունքում մենք Մեծ Մասրիկ համայնքում ունեցանք զոհ, երկու վիրավոր, վերջերս նաև 14-ամյա Նարեկը վիրավորվեց»,- այսօր Հայկական միասնական տեղեկատվական կենտրոնում տեղի ունեցած ճեպազրույցի ժամանակ ասել է Գեղարքունիքի մարզպետ Գնել Սանոսյանը:

Գնել Սանոսյանն ասել է նաև, որ մարզում շուրջ 40 առանձնատուն է  վնասվել, երկու դպրոց: Մեծ Մասրիկում խոցման հետևանքով նաև գազատար է վնասվել՝ հրդեհի պատճառ դառնալով: Բազմաթիվ դաշտերում կան հրետակոծությունների հետևանքներ, որոնք գյուղատնտեսական աշխատանքներ իրականացնելու հարցում են նաև խնդիրներ առաջացնում: Ինչ վերաբերում է քաղաքացիական պաշտպանությանը, ապա այն, ըստ մարզպետի, բավականին լավ է:

«Մինչև այս պահը մարզում խոցվել է 18 ԱԹՍ, դրանք միայն Վարդենիսի տարածաշրջանում են: ԱԹՍ-ներ խոցվել են նաև Մարտունու և Գավառի տարածաշրջանում»,- հավելել է Սանոսյանը: