«Ռուստամը բացառիկ հայրենասեր, բացառիկ ազնիվ մարդ էր։ Երբեմն զարմանում էի, թե մեր դարում մարդ ինչպես կարող է այդպիսին լինել․ նրա մեջ մանկական մաքրություն կար։ Ռուստամն ահավոր անհանդուժող էր ստի, կեղծիքի, պոպուլիզմի, այս «դիշովկայության» նկատմամբ, որը վերջին տարիներին համատարած տիրում է։ Մեր հերոս ընկերը մի հավատամք ուներ՝ հայրենի հողը․ նա միշտ պատրաստ էր հայրենի հողի համար իր կյանքը տալ և տվեց։ Արցախյան բոլոր պատերազմներում՝ և՛ առաջին պատերազմում, և՛ Ապրիլյան պատերազմում և՛ այս պատերազմում ռազմի դաշտ առաջին մեկնողներից է եղել», — խոսելով «Սև հովազ» ջոկատի հրամատատար, ԲՀԿ-ական նախկին պատգամավոր Ռուստամ Գասպարյանի մասին՝ MegaNews.am-ի թղթակցի հետ զրույցում պատմեց ԱԺ «Բարգավաճ Հայաստան» խմբակցության պատգամավոր, հերոսի ընկեր Նաիրա Զոհրաբյանը։

Հիշեցնենք՝ հոկտեմբերի 15-ին Արցախում ծանր մարտերի ընթացքում թշնամու անօդաչու թռչող սարքը հարվածել էր մեքենային, որի մեջ եղել էին Ռուստամ Գասպարյանն ու իր որդին: Հերոս որդին տեղում մահացել էր։ Գասպարյանը ծանր վիրավորում էր ստացել գլխի եւ մարմնի այլ հատվածներում։ Մեր բժիշկները Ստեփանակերտում, ապա «Էրեբունի» ԲԿ-ում ամեն ինչ արեցին Արցախյան բոլոր պատերազմների բովով անցած, լեգենդ դարձած Ռուստամ Գասպարյանի կյանքը փրկելու համար, բայց, ցավոք, հերոսի կյանքը փրկել չհաջողվեց․ երեկ՝ հոկտոմբերի 17-ին մահացավ «Սև հովազ» ջոկատի հրամատատարը։ Նա միացավ հանուն հայրենիքի ու հանուն մեզ իր կյանքը զոհաբերած անմահներին։

Նաիրա Զոհրաբյանը նշեց՝ հիմա չի կարող շատ բան պատմել այն մասին, թե հերոս Ռուստամ Գասպարյանը ո՛ր դիրքում է եղել, ինչ սխրանքներ է գործել։

«Կարծում եմ՝ այդ ամենի մասին կխոսեն պատկան մարմինները, բայց կարող եմ ասել այն, ինչ ինձ պատմել են ականատեսները․ եթե չլիներ Ռուստամը, շատ-շատ զոհեր էին լինելու հենց այդ օրը, այսինքն՝ Ռուստամն, իսկապես, հերոսական տղա էր, հերոսական հայ՝ զերծ կազարմաներում հերոսի, զինվորի հացն ուտող, խաշլամա սարքող «ֆիդայիների» տեսակից։ Նա մարդկային ազնիվ տեսակ էր, այնպիսի տեսակ, որ իր մեծ որդուն միշտ վերցնում էր և գնում պատերազմի․ նա հայրենիքի համար չխնայեց նաև իր որդուն», — ասաց Նաիրա Զոհրաբյանը՝ ընդգծելով՝ հերոս Ռուստամի երկու որդիները անձնուրաց, ջերմեռանդ ու անմնացորդ սիրով միշտ սիրել են հայրենիքը, ինչպես իրենց հայրը։

Խոսելով Ռուստամ Գասպարյանի մասին՝ ասաց ԱԺ «Բարգավաճ Հայաստան» խմբակցության պատգամավոր Վարդևան Գրիգորյանը նշեց․ «Խոր կսկիծով ցավում եմ իմ լավ ընկերոջ, կուսակից ընկերոջ կորուստը։ Ռուստամը այն հայորդիներից էր, որ նախորդ պատերազմներում էլ կարողացավ իր արիությամբ, համարձակությամբ, հայրենիքը շատ սիրելով մարտնչել հանուն հայրենիքի»։ Պպատգամավոր Վարդևան Գրիգորյանը, որը Գասպարյանների ընտանիքի բարեկամն է, ևս փաստում է՝ հերոս Ռուստամն իր քաջությունն էր փոխանցել իր զավակներին․ նրա երկու որդիները ևս միշտ պատրաստ են եղել հայրենիքի համար իրենց կյանքը զոհել։

«Կորուստի ցավն այնքան մեծ է, որ հնարավոր չէ բառերով նկարագրել։ Մենք կորցրիք հայրենասեր, կյանքը հայրենիքին նվիրելու պատրաստակամություն ունեցող հերոս Ռուստամին, ցավոք, Ռուստամի հերոս որդուն էլ կորցրինք։ Սա մեծ ցավ է», — խոր կսկիծով ասաց Վարդևան Գրիգորյանը։

Հասմիկ Սարգսյան