Մեկ ժամ առաջ հրավեր ենք ստացել կառավարությունից և մեր կուսակցությունը որոշում է կայացրել, որ երկրորդ հանդիպմանը ևս ՀՀԿ-ն պետք է մասնակցի, կառավարությունում վարչապետ Նիկոլ Փաշինյանի հետ արտախորհրդարանական ուժերի հետ հանդիպումից առաջ լրագրողներին ասաց ՀՀԿ մամուլի խոսնակ Էդուարդ Շարմազանովը:

Հարցին, թե իշխանությունը համաձա՞յն է 16 կուսակցությունների՝ ռազմաքաղաքական շտաբ ձևավորելու շուրջ առաջարկին, նա նշեց.
«Կլսենք պարոն վարչապետին, հետո արդեն փակ հանդիպում է, մեր կարծիքները կփոխանակենք»:

Դիտարկմանը, որ շատերի կարծիքով կուսակցությունների առաջարկը հակասահմանադրական է, հանրապետական գործիչը նկատեց՝ հիմա ներքաղաքական խժդժությունների ժամանակը չէ:

«Մեղադրողները կամ ուշադիր չեն ընթերցել տեքստը, կամ էլ, միգուցե, ունեն այլ նպատակներ: Մեր դիմումի հասցեատերը կառավարությունն է և վարչապետը, և մենք այլ կողմերից պատասխաներ չենք էլ ակնկալում», - նշեց ՀՀԿ-ական գործիչը:

Շարմազանովը նաև նկատեց, որ սա փակ հանդիպում է և կա ջենթլմենական պայմանավորվածություն, որ դրա մանրամասները չեն ներկայացնում:

«Այսօր բոլորիս խնդիրը Արցախն է, մեր ժողովրդի անվտանգությունն է», - ասաց նա: