Չինաստանի 500 խոշորագույն գործարարների կարողությունն ընթացիկ տարում աճել է ավելի, քան նախորդ 5 տարիներին միասին։ Այս մասին հայտնում է Le Figaro-ն՝ հղում անելով Hurun ընկերության ամենամյա հետազոտության տվյալներին։

2019-ի համեմատ Չինաստանում (առանց Հոնկոնգի և Մակաոյի) միլիարդատերերի թիվն ավելացել է 257-ով՝ հասնելով 878-ի։

Կորոնավիրուսի զսպման համար երկրում ընդունված կարանտինային կոշտ միջոցառումները բարենպաստ են եղել թվային հսկաների համար, քանի որ միլիոնավոր չինացիներ մեկուսացել են իրենց տներում։

Իր կարողությամբ առաջին տեղում է շարունակում մնալ Alibaba-ի ղեկավար Ջեք Ման՝ 58․8 մլրդ դոլարով։ Նրան հաջորդում է WeChat հավելվածով հայտնի Tencent թվային հսկայի ղեկավար Պոնի Ման՝ 57․4 մլրդ դոլար կարողությամբ։ Երրորդ տեղում է շշալցված ջրեր արտադրող Nongfu Spring կոնցեռնի ղեկավար Չժուն Շանշանը՝ 53․7 մլրդ դոլար կարողությամբ։

Չինաստանի տնտեսությունը շարունակում է կորոնավիրուսի ֆոնին վերականգնվել։ Երկրի ՀՆԱ-ն երրորդ եռամսյակում, 2019-ի նույն ժամանակահատվածի համեմատ, աճել է 4․9 տոկոսով։