Պատերազմում հաջողություն ասածը հարաբերական է: Րոպեների ընթացքում կարող է ընթացք փոխվել: Սա բլից-կրիգ չէ, այլ լայնածավալ պատերազմ՝ հայկական բնագծի ամբողջ երկայնքով: Օրվա ընթացքում ունենում ենք նաև նահանջ, որը կարող է լինել տակտիկական նկատառումներով, ուժերը տեղաբաշխելու, ժամանակ շահելու, բայց ամենակարևորը՝ նոր զոհեր չունենալու նպատակով: Նման դիտարկում է կատարել «Երեկոյան լուրեր Աբրահամ Գասպարյանի հետ» հաղորդման մեկնաբան Աբրահամ Գասպարյանը:

Նա նշել է, որ սա պատերազմ է, որի մասնագետները դաշտո՛ւմ են, մեկը՝ Հակաօդային համալիրի վահանակի, մյուսը՝ թնդանոթի ձգանի մոտ, երրորդը՝ թշնամու շարժին՝ հուսալի թաքստոցից հետևող դիպուկահար է, չորրորդը՝ գործողությունների համակարգման շտաբում: Սա ասում եմ, որպեսզի բոլորս պատկերացնենք լրջությունը, որքան էլ պատերազմի իրական պատկերի մասին շատերի տեղեկությունները լինեն մակերեսային:

«Պատերազմը, այն էլ թուրքի հետ, այն էլ՝ հայի՛ մղած, այն էլ՝ աշխարհաքաղաքական այդ բարդագույ՛ն պայմաններում...բազմոցին նստածի համար փլեյսթեյշընի խաղ չէ: Սա ասում եմ, որովհետև պարտավոր ենք լրջանալ, կարգապահ լինել, ռազմի գործից բան չհասկանալով՝ մտքի փայլատակումներ թույլ չտալ, չտիրաժավորել ու խուճապային տրամադրություն չստեղծել: Մտան Հադրութ, դուրս եկան, շպրտվեցին, զոհեր ունենք, ազիկները այսինչ տեսանյութն են գցել....Աստծո սիրուն: Գուցե և մեր պաշտոնական լրահոսը ճիշտ մեխանիզմով չի մատուցվում: Հիմա պատերազմական վիճակում ենք և այն քննարկելու ժամանակը չէ: Սա երկաթբետոնե նյարդերի՛ պատերազմ է, հոգեբանական ճնշման ծանր ալիք, որի տակից պիտի դուրս գանք:

Սա ռեսուրսների՛ պատերազմ է, իսկ առաջին ու ամենագլխավոր ռեսուրսը՝ մարդն է, նրա հոգեբանությունը, կամային հատկանիշները, ապրելու ու հաղթելու կամքը»,-նշել է նա:

Նա ընդգծել է, որ ամենակարևոր բանը, որ կարող ենք մենք անել՝ տղերքին չխանգարելն է, իրար կոկորդ չկրծելը, որ հանգիստ խղճով կատարեն իրենց առաքելությունը:

«Սա կռիվ է, գոյությա՛ն կռիվ, ամեն թիզ հողի համար մի ամբողջ սերունդ ենք զոհաբերում: Ով գեթ մեկ անգամ Արցախում եղել է, ով գոնե պատկերացնում է քարտեզը, գիտի Հադրութի տեղը, Ջրականի ու Կովսականի դիրքը՝ պետք է հասկանա, որ այդտեղ հարթավայրային տարածք է, անապատ՝ բաց երկնքի տակ և թշնամին իր ավիացիայով ավելի հեշտ է կարողանում թիրախ դարձնել մեզ, քանի որ պատսպարվելու հնարավորություններն ավելի քիչ են, քան թփուտ ու լեռնային վայրերը:

Եվ դա՛ է պատճառը, որ հարավում մարտերը չեն հանդարտվում, մի օր թշնամի՛ն է առաջ գալիս, մի օր՝ մեկընդմիշտ նահանջում: Ասեմ ձեզ, որպես այդ ամենը տեսած մարդ...թուրքի կովկասյան սորտը՝ ադրբեջանցին, կռվել չգիտի, նրա բանակի հետևակը՝ կամային ոչ մի հատկանիշ չունի, բարոյապես՝ մաշված է, չգիտե՛ ինչի համար է կռվում:

Նրան շարժում է թուրք կոնստրուկտորը՝ որպես ռոբոտ, վախկո՛տ ռոբոտ: Դրա համար էլ Արցախի տափաստանային այդ տարածքներ՝ արածելու են գալիս վարձկաննե՛րը, որոնք կռվել են Տրիպոլիում, Միսրատայում, Հալեպում, Թադմուրում, Հոմսում և Իդլիբում...բոլորն էլ՝ հարթավայրային տարածքներ են»,-նշել է նա:

Նա հիշեցրել է, որ Ադրբեջանում ցանկացած գործընթաց, ցանկացած քաղաքական ընդդիմադիր ուժ, լրագրող, գործիչ կամ մտավորական…ՊԱՐՏԱԴԻՐ գտնվում է անվտանգային-հետախուզական ծառայությունների հսկողության տակ կամ նրանց գործակալն է: Ուստիև՝ թեկուզև ընդդիմադիր շրջանակից դուրս եկած տեղեկություն լսելիս կամ կարդալիս պետք է լինել սկեպտիկ: