Ահաբեկիչներն իրենց գործունեությունը ֆինանսավորում են առցանց խաղատների միջոցով․ ՌԴ անվտանգության խորհուրդ
РИА «Новости» լրատվական գործակալության փոխանցմամբ՝ Ռուսաստանի անվտանգության խորհրդի քարտուղարի տեղակալ Յուրի Կոկովը խոսել է այն մասին, թե ինչպես են ահաբեկիչները ֆինանսավորում իրենց գործունեությունը: Գրում է Gazeta.ru-ն։
«Ֆինանսական ռեսուրսներ ձեռք բերելու համար ահաբեկիչների հանցակիցները ստեղծում են հատուկ կայքեր, առցանց խանութներ, որոնք առաջարկում են գրքեր, աուդիո և վիդեո ձայնագրություններ և ծայրահեղական բնույթի այլ ապրանքներ», - հայտարարել է Կոկովը:
Անվտանգության խորհրդի քարտուղարի տեղակալը հավելել, որ ահաբեկիչները օգտագործում են նաև առցանց խաղատներ, զանգվածային նամակներ նվիրատվություններ հավաքելու, ֆոնդային շուկաներ, էլեկտրոնային աճուրդներ, ֆոնդային բորսաներ:
Նաև, ըստ նրա, հանցագործները գումար են ստանում մարդասիրական բարեգործական հիմնադրամների և կազմակերպությունների միջոցով:
Կոկովն ընդգծել է, որ 2019-2020թթ․ առաջին կեսին Ռուսաստանի ֆինանսական հետախուզական գործակալությունները նախապատրաստել են ավելի քան 400 նյութ՝ հայտնաբերված սխեմաների և ալիքների վերաբերյալ:
