Երևանում «Փեթակ» առևտրի կենտրոնի աշխատակիցներն այսօր առավոտից գործադուլ են անում, հավաքվել են առևտրի կենտրոնի մուտքերի մոտ և բակում՝ պահանջելով, որ  «Փեթակ»-ի տնօրինությունը նվազեցնի  առևտրի տաղավարների վարձավճարները, քանի որ պատերազմական իրավիճակով պայմանավորված՝ արևտուրը շատ քիչ է։ Առևտրականները նշում են՝ ավելի լավ է՝ չաշխատեն , քանի որ  եթե նույնիսկ աշխատանքի գնան, այնքան քիչ առևտուր ու  ու փոքրիկ շահույթ են ունենալու, որ հազիվ կարողանան  վաճառակետի վարձավճարը մուծել կամ, գուցե, անգամ դա էլ  չկարողանան անել այդ փոքրիկ շահույթով։

«Փեթակ»-ում աշխատող առևտրականները պնդում են՝  գոնե այս օրերին տնօրինությունը պետք է ըմբռնումով մոտենա ու վարձավճարի զեղչեր սահմանի։ Ընդ որում, պետք է  շեշտենք՝ «Փեթակ»-ի սեփականատերը՝ Վարուժան Գրիգորյանը ծնունդով արցախցի է։

«Մեզանից շատերը Համահայակական հիմնադրամին գումարներ են նվիրաբերել։ Մենք մյուսներից ոչ պակաս ուզում ենք ինչ-որ կերպ օգնել, աջակցել մեր զինվորներին, մեր հայրենիքի պաշտպանններին, բայց հիմա  ցավալիորեն ստեղծվել  է մի վիճակ, որ նորմալ  գումար վաստակել չենք կարողանում, ուր մնաց՝ այդքան վարձավճար մուծենք։ Հավատացե՛ք՝ այս օրերին այլ ելք չկար, ստիպված ենք դուրս եկել, այսպես կանգնել ենք այստեղ, ակցիա ենք անում։ Հաստատ այս ամենը լավ օրից չենք անում», — ասաց առևտրականներից մեկը՝ պնդելով՝  «Փեթակ»-ի աշխատողները այս առևտրի կենտրոնի մուտքերը փակ կպահեն այնքան ժամանակ, քանի դեռ իրենց  առջև ծառացած խնդիրը լուծում չի ստացել։

Հասմիկ Սարգսյան