Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի տնօրինությամբ հայաստանյան թեմերի բոլոր եկեղեցիները բաց կլինեն շուրջօրյա, որպեսզի մեր հավատացյալները կարողանան ցանկացած ժամի այցելել և աղոթք վերառաքել առ Աստված՝ մեր Հայրենիքի խաղաղության և Հայոց բանակի հաղթանակի համար։ Ներկայացնում ենք Արարատյան Հայրապետական թեմի՝ Երևանի շուրջօրյա գործող եկեղեցիների ժամանակացույցը։ Հոկտեմբերի 24-ին՝ Արաբկիրի նորակառույց եկեղեցի Հոկտեմբերի 25-ին՝ Առաջնորդանիստ Ս. Սարգիս եկեղեցի Հոկտեմբերի 26-ին՝ Նոր Նորքի Ս. Սարգիս եկեղեցի Հոկտեմբերի 27-ին՝ Ս. Երրորդություն եկեղեցի Հոկտեմբերի 28-ին՝ Քանաքեռի Ս. Հակոբ եկեղեցի Հոկտեմբերի 29-ին՝ Ն. Չարբախի Ս. Խաչ եկեղեցի Հոկտեմբերի 30-ին՝ Զորավոր Ս. Աստվածածին եկեղեցի Հոկտեմբերի 31-ին՝ Նորքի Ս. Աստվածածին եկեղեցի Նոյեմբեր 1-ին՝ Նոր Նորքի 1-ին զնգ. Ս. Աստվածածին եկեղեցի Նոյեմբեր 2-ին՝ Մալաթիայի Ս. Աստվածածին եկեղեցի Նոյեմբեր 3-ին՝ Կոնդի Ս. Հովհաննես եկեղեցի Նոյեմբեր 4-ին՝ Դավթաշենի Սրբոց Նահատակաց եկեղեցի Նոյեմբեր 5-ին՝ Նուբարաշենի Սրբոց Նահատակաց եկեղեցի Նոյեմբեր 6-ին՝ Նորագավիթի Ս. Գևորգ եկեղեցի Նոյեմբեր 7-ին՝ Ս. Աննա և Կաթողիկե Ս. Աստվածածին եկեղեցիներ Նոյեմբեր 8-ին՝ Ավանի Ս. Աստվածածին եկեղեցի Նոյեմբեր 9-ին՝ Վ. Շենգավիթի Սրբոց Առաքելոց եկեղեցի Նոյեմբեր 10-ին՝ Եռաբլուրի Սրբոց Վարդանանց Նահատակաց եկեղեցի:
Բրիտանական հեղինակավոր BBC-ն հետաքննել է ադրբեջանցի հատուկ ջոկատայինների կողմից հայ ռազմագերիներին գերեվարելու, ապա սպանության տեսանյութերը՝ փաստելով, որ հրաման տվող զինվորականը խոսում է ադրբեջանական շեշտադրմամբ ռուսերենով, իսկ սաղավարտը, զենքը, որ կրում են, ադրբեջանական բանակինն են: BBC-ն մասնավորապես նշել է, որ Հայաստանի իշխանությունները հայտնել են, որ սպանվածները 73-ամյա Բենիկ Հակոբյանն ու 25-ամյա Յուրի Ադամյանն են:Այս մասին է հաղորդում «Արմենպրես»-ը։
BBC- ն ուսումնասիրել է տեսանյութերը և հաստատել, որ դրանք նկարահանվել են հոկտեմբերի 9-15-ն ընկած ժամանակում Արցախում՝ Հադրութում, որտեղ բախումներ են տեղի ունեցել: Նշվում է նաև, որ գերեվարելու տեսանյութում զինվորներից մեկը գերիների հետ խոսում է ռուսերեն, սակայն ադրբեջանական ծանր շեշտադրմամբ, իսկ մյուս զինվորականի հետ՝ հենց ադրբեջաներեն: BBC- ն հաստատել է, որ երկու տեսանյութերում էլ հրաման տվողը բնիկ ադրբեջանախոս է, նկատել նաև, որ առաջին տեսանյութում գերեվարվածները կարծես նույն մարդիկ են, ինչ երկրորդում երևացող գնդակահարվածները, քանի որ կրում են նույն հագուստը: BBC-ն նշել է նաև, որ բրիտանական Bellingcat հետաքննական լրագրության մասնագիտական հարթակն արդեն բացահայտել է, որ տեսանյութում երևացող զենքերը և սաղավարտները իսկապես օգտագործվել են ադրբեջանական բանակում:
BBC-ն տեսանյութի առնչությամբ խոսել է բրիտանական ռազմական հետախուզության նախկին սպայի հետ: Ռազմական հետախուզության սպան, որն անվտանգության նկատառումներից ելնելով համաձայնել է խոսել անանունության պայմանով, ասել է, որ հիմքեր չի տեսնում ենթադրելու, որ տեսանյութը կեղծ է` չնայած նրան, որ ադրբեջանական կողմը տեսանյութն ակտիվորեն տարածելուց հետո փորձում էր հավաստիացնել, որ կեղծ է: «Սրանք իրական փամփուշտներ են, սա իսկական սպանություն է, և ես հիմք չեմ տեսնում ենթադրելու, որ դա բեմադրված է», – ասել է սպան։
BBC-ն շեշտել է նաև, որ Հայաստանի մարդու իրավունքների պաշտպան Արման Թաթոյանը պաշտոնապես Ադրբեջանի կողմից երկու ռազմագերիների սպանության տեսանյութը որակել է որպես «անհերքելի ռազմական հանցագործություն»: Արցախի ՄԻՊ Արտակ Բեգլարյանն էլ BBC- ին հայտնել է, որ տեսանյութերի երկու տղամարդիկ տեղացիներ են: Նա ասել է, որ Բենիկ Հակոբյանը զինվորական չի եղել, եղել է քաղաքացի՝ Հադրութից, իսկ Յուրի Ադամյանը, ամենայն հավանականությամբ, զինծառայող է եղել հարևան գյուղից:
Լրատվամիջոցը հիշեցրել է նաև, որ Եվրոպայի խորհրդի մարդու իրավունքների հանձնակատարը հայտարարել է, որ ստացել է տեսանյութը և հետաքննելու է մարդու իրավունքների բոլոր ենթադրյալ խախտումները:
