ԱԺ «Իմ քայլը» խմբակցության պատգամավոր Ռուստամ Բաքոյանն անդրադարձել է BBC-ի հրապարակումներից մեկին , որում եզդիների վերաբերյալ արվում են «վերլուծություններ» ու համեմատություններ, որոնք իրականության հետ որևէ առնչություն չունեն։

«Հայաստանում ապրող եզդիներն ինքնակամ են միացել պայքարին և ցավալի է, որ «Բի Բի Սի» (BBC) հեղինակավոր լրատվականը մեզ համեմատում է վարձկանների կամ ահաբեկիչների հետ, որն առնվազն անհեթեթություն է»,- հայտարարել էր Ռուստամ Բաքոյանը։

«Նրանք, հավանաբար, իմ թվիթերյան էջից են որոշ գրառումներ վերցրել, ուսումնասիրել իմ էջը, նկատել, որ ես գրառումներ եմ անում, լուսանկարներ ու տեսանյութեր տեղադրում այն մասին, որ այսօր մենք ամուր կանգնած ենք, պաշտպանում ենք մեր հայրենիքը։ Ես վստահ եմ, որ BBC-ի այս հրապարակումը պատվերի հետ է կապված», — Meganews.am- ի հետ զրույցում նշեց պատգամավոր Ռուստամ Բաքոյանը՝ ևս մեկ անգամ վերահաստատելով՝ եզդիներն ինքնակամ մեկնում են սահման՝ պաշտպանելու մեր հայրենիքի սահմանները։

«Ես երևէ արտառոց բան չեմ տեսնում այստեղ։ ՀՀ քաղաքացի եզդիներն ինքնակազմակերպվում են, կամավորագրվում և մեկնում սահման։ ՀՀ քաղաքացի եզդիները հայրենիքի նկատմամբ իրենց պարտքն են կատարում», — նշեց Ռուստամ Բաքոյանը։

Այս համատեքստում անդրադառնալով միջազգային հանրության արձագանքին՝ Ռուստամ Բաքոյանը նշեց․ «Մենք 2014-ին ցեղասպանություն ենք տեսել, ահաբեկչության ու ցեղասպանության վրա աչք փակող միջազգային հանրություն ենք տեսել, և այն, ինչ հիմա կատարվում է, ինձ չի զարմացնում։ Հիմա մենք պետք է մեր ռեսուրները ճիշտ համակարգենք ու աշխատենք։

Մի բան էլ կուզենայի ավելացնել․ ի տարբերություն Ադրբեջանում բնակվող ազգային փոքրամասնությունների, որոնք տեղաբնիկ ժողովուրդներ են և Ադրբեջանի տարածքների նկատմամբ ունեն ավելի մեծ իրավունքներ, քան «ադրբեջանցի» կոչվող այդ հանրույթը՝ ավելի քիչ իրավունքներ ունեն իրենց հայրենիքում, քան մենք՝ եզդիներս, որ ցեղասպանությունից ու կոտորածներից մազապուրծ՝ գաղթել ենք ու եկել Արևելյան Հայաստան, հանգրվան ենք գտել այստեղ։ Մենք այստեղ ավելի մեծ իրավունքներ ունենք ու այստեղ մեզ ավելի լավ ենք զգում, քան նրանց ազգային փոքրամասնությունները իրենց հայրենիքում», — ընդգծեց Ռուստամ Բաքոյանը։

Հայաստանի երիտասարդ եզդիների ասոցիացիայի նախագահ Սաիդ Ավդալյանն էլ մեր թղթակցի հետ զրույցում ընդգծեց․ «Այն, որ եզդիներն ինքնակամ են մասնակցում այս պատերազմին, հենց եզդիները հաստատում են իրենց հայտարարություներով ու գործողություններով։ Հայաստանի ժողովուրդն ու իշխանությունները երբեք մեր ժողովրդին չեն պարտադրել պատերազմ գնալ՝ հայրենիքը պաշտպանելու։ Հայաստանում ապրող եզդիները պարտավոր են իրենց ընտանիքը, իրենց երկիրը պաշտպանել։ Եթե եզդիները այլ երկրներից գային ու հիմա մասնակցեին պատերազմին, միգուցե, BBC-ն նման բաներ գրելու փոքրիկ առիթ ունենար։ Հայաստանի 40 հազար կազմող եզդիական համայնքն իր պարտավորությունն է համարում ՀՀ-ում տեղի ունեցող բոլոր գործընթացներին՝ քաղաքական, տնտեսական․․․ բնականաբար, նաև ռազմական գործողություններին»։

Սաիդ Ավդալյանը նշեց՝ իսլամիստ ահաբեկիչները, որոնք Թուրքիայի ու Ադրբեջաանի հովանու ներքո կռվում են ընդդեմ հայ ժողովրդի, 2016 թվականին եզդիներին ցեղասպանության ենթարկեցին․ եզդիները գիտեն, թե ովքեր են այդ ահաբեկիչները։, ինչպիսի դաժանությունների ու անմարդկային արարքների են նրանք պատրաստ։

«Եզդի ազգը ցեղասպանությունից հետո էլ կարողացել է ոտքի կանգնել ու իր տեղը գտնել այս արևի տակ։ Իսլամիստները կռվում են ընդդեմ հայ ժողովրդի․ դա հաստատել են մազմաթիվ երկրների նախագահներ, միջազգային լրատվամիջոցներ, իսկ եզդիներին ահաբեկիչների հետ համեմատելը խստորեն դատապարտելի է։ Դատապարտելի է ցանկացած կազմակերպության հայտարարություն, որը կարող է ՀՀ քաղաքացի եզդիների՝ այս ռազմական գործողություններին մասնակցելը համարել ռազմական գործողություն։ Մենք պայքարում ենք մեր երկրի, ազգի, ընտանիքների անվտանգության համար։ Այդպիսի հայրենասիրական, անձնվեր քայլը ոչ մի կեչպ չի կարելի անգամ համեմատել ահաբեկչական գործողությունների հետ», -նշեց Սաիդ Ավդալյանը՝ հավելելով՝ BBC-ի վերոնշյալ հրապարակման հեղինակը, միգուցե, ադրբեջանական կամ կամ թուրքական սև խավիարի կամ նավթադոլարների միջոցով կաշառված ինչ-որ անձնավորություն է, ուստի այսպիսի պրոպագանդա է փորձում անել։

Իսկ վերջում ի հավելումն վերոնշյալի՝ հիշեցնենք՝ Ապրիլյան պատերազմի նահատակված հերոս Քյարամ Սլոյանի եղբայրը կամավոր մեկնել է սահման՝ սուրբ հայրենիքը պաշտպանելու, իսկ հերոսի մայրը՝ տիկին Նվարդը նշում է՝ հպարտ է, որ նման հայրենասեր զավակներ է դաստիարակել։ Հայրենիքի, հայրենասիրության ու նվիրումի մասին պատկերացում չունեցողներըը պետք է իմանան, որ մեր հայրենիքում՝ մեր կողքին, ապրում են այսպիսի եզդիներ։

 

Հասմիկ Սարգսյան