Հանրահայտ բրիտանական BBC լրատվական գործակալությունը հետաքննել է տարածում գտած տեսանյութերը, որտեղ ադրբեջանցի հատուկ ջոկատայինները նախ գերեվարում, ապա գնդակահարում են հայ ռազմագերիներին։
BBC-ն նշել է, որ Հայաստանի իշխանությունները նույնականացրել են 73-ամյա Բենիկ Հակոբյանին և 25-ամյա Յուրի Ադամյանին։ Ադրբեջանը ժխտել է այդ տեսագրությունների իսկությունը՝ որակելով դրանք որպես կեղծիք։
BBC-ն ուսումնասիրել է դրանք և ներկայացրել փաստեր․ «Առաջին տեսանյութում երևում է, որ հայազգի Բենիկ Հակոբյանն ու Յուրի Ադամյանը գերեվարվում են: Տեսանյութում ինչ-որ մեկը ռուսերեն է խոսում՝ ադրբեջանական ուժեղ շեշտադրմամբ, տղամարդկանց հրամայում է առաջ գնալ, հանձնել զենքն ու բարձրացնել ձեռքերը։ Նա այլ զինվորների հետ խոսում է ադրբեջաներեն՝ նրանց պատվիրելով չսպանել գերիներին։
Յուրի Ադամյանը հանում է սաղավարտն ու բաճկոնը և ձեռքերը վեր բարձրացնում։ Բենիկ Հակոբյանին հրում են գետնին, և նա ընկնում է՝ ցավից հառաչելով։ 
Առաջին տեսագրությանը հաջորդել է երկրորդը, որտեղ երևում է երկու տղամարդկանց գնդակահարումը»։ 
BBC-ն հաստատել է, որ երկու տեսանյութերում հրահանգ տվողն ադրբեջանախոս է՝ տարածաշրջանային շեշտադրմամբ։ 
BBC-ն նաև ուսումնասիրել և հաստատել է, որ տեսանյութերը նկարահանվել են Հադրութ քաղաքում: Հավանական է, որ տեսանյութն արձանագրվել է հոկտեմբերի 9-15-ն ընկած ժամանակահատվածում. 
BBC-ն նշել է նաև, որ բրիտանական Bellingcat հետաքննական լրագրության մասնագիտական հարթակն արդեն բացահայտել է, որ տեսանյութում երևացող զենքերը և սաղավարտներն իսկապես օգտագործվել են ադրբեջանական բանակում:
Լուսանկարներում հստակ երևում են ապացույցները՝ տեղորոշման միջոցով։