«Ես եմ Վլադիմիր Սոլովյովին նամակ գրել, ասել՝ Ձեզ սխալ տեղեկություն են փոխանցել»,-Aravot.am-ի հետ զրույցում պարզաբանեց ՀՀ վարչապետ Նիկոլ Փաշինյանի խոսնակ Մանե Գևորգյանը:

Հիշեցնենք՝ «Полный контакт | Соловьёв LIVE» հաղորդաշարի եթերում Վլադիմիր Սոլովյովը մի այսպիսի դրվագ էր ներկայացրել. «Ինձ գրել է Նիկոլ Փաշինյանի օգնականը, թե անարդար է այդ ամենը, քանի որ ինքը ՌԴ դրոշը փորձում էր վերցնել, փրկել է, որ այն չոչնչացվի և պրովոկացիա չլինի»:

Մանե Գևորգյանը մեզ հետ զրույցում ասաց, որ ՌԴ դրոշ չի այրվել և հորդորեց դիտել այն տեսանյութերը, որոնք վերաբերում են հունվարի 15-ին Հայաստանում Ռուսաստանի դեսպանատան դիմաց տեղի ունեցած բողոքի ցույցին, երբ քաղաքացիները պահանջում էին Գյումրիում Ավետիսյանների ընտանիքի սպանության մեջ մեղադրվող Վալերի Պերմյակովին հանձնել Հայաստանի իրավապահ մարմիններին: Նա ասաց. «Եթե ես ճիշտ եմ հիշում, ոչ մեկ էլ այդ դրոշը չի այրել, կարող եք տեսնել այդ կադրերը: Այսինքն՝ իրավաբանության աշխարհում մի տերմին կա, որ ասում են, եթե գետինը թաց է, դա չի նշանակում, որ անձրև է եկել: Հիմա այդ սկզբունքն է. ինձ տեսնում են այնտեղ կանգնած, ենթադրել են, որ ես մասնակցել եմ Ռուսաստանի դրոշի այրման գործողություններին, այնինչ ընդհանրապես պատկերն այդպես չէ: Մի սքրինշոթ են արել, տվել Վլադիմիր Սոլովյովին, ինքն էլ դա օգտագործել էր, ես էլ իրեն նամակ էի գրել: Ես նամակում գրել եմ՝ Ձեզ սխալ տեղեկություն են փոխանցել»:

Հետաքրքրվեցինք՝ այդ նամակից հետո Վլադիմիր Սոլովյովի կողմից ի՞նչ արձագանք է եղել, Մանե Գևորգյանը պատասխանեց. «Ինքն ուղղել է. ես քիչ առաջ էի նայում տեսանյութը, որ ինքն այդ ամենը պատմում է, ասում է, որ նամակ են գրել իրեն ու ասում, որ ես չեմ եղել այրողներից մեկը, բայց ընդհանրապես այդ դրոշը չի էլ այրվել»:

Մեր հստակեցմանը՝ բացի այն, որ Վլադիմիր Սոլովյովն ուղիղ եթերում անդրադարձել է այս հարցին, դրանից բացի անձնապես արձագանքե՞լ է իրեն, Մանե Գևորգյանը պատասխանեց. «Ես իր հետ կապի մեջ եմ, իհարկե, ինձ գրել է, արձագանքել է, ասել է, որ իհարկե, ինքն իմ նամակի բովանդակությունը կընթերցի, ես էլ գրել եմ, որ դրա անհրաժեշտությունը չեմ տեսնում, ուղղակի տեղյակ եմ պահում իրեն, որ չգիտեմ՝ ով և ինչ նպատակ հետապնդելով է իրեն այդ տեղեկությունը փոխանցել, բայց միանշանակ դա չի համապատասխանում իրականությանը»: