The Washington Post-ն անդրադարձել է Արցախում ռազմական գործողություններին։ Լրատվամիջոցը հոդվածում հիշեցնում է, որ անցյալ հանգստյան օրերին Միացյալ Նահանգները միջնորդել են, որպեսզի հրադադարի ռեժիմ սահմանվի պատերազմող հարևանների՝ Հայաստանի և Ադրբեջանի միջև: Ըստ որոշ տվյալների՝ հրադադարը հազիվ մեկ ժամ է տևել:

«Փոխարենը Կովկասում հակամարտությունը մոլեգնում է՝ բերելով տարածաշրջանում վերջին երեք տասնամյակների ընթացքում վայրագությունների վատթարագույն շրջանը: Քաղաքացիական զոհերը գնալով ավելանում են»,- նշված է նյութի մեջ:

«Կլաստերային զինամթերքի օգտագործումը քաղաքացիական բնակավայրերի վրա դաժան և անխոհեմ է. դա հանգեցնում է մահվան, տուժածների և թշվառության պատճառ է դառնում», – լրատվամիջոցը մեջբերում է Amnesty International- ի Արևելյան Եվրոպայի և Կենտրոնական Ասիայի հարցերով տնօրեն Մարի Սթրաթերսի խոսքերը:

«Հակամարտությունը կարող է շուտով հասնել անդառնալի մի կետի, երբ այն չի դադարի առանց մարտերի դրամատիկ ընդլայնման և մարդկային կորուստների ավելացման», – Ըստ The Washington Post-ի՝ ասել է Քերի Քավանոն ՝ Կենտուկիի համալսարանի պրոֆեսորը, որն օգնել է 2001 թվականին կողմերին միջնորդավորված բանակցություններ վարել:

Ներկայացվում է նաև Today’s WorldView- ի հետ Վաշինգտոնում Հայաստանի դեսպան Վարուժան Ներսեսյանի զրույցը։

«Հայերն այժմ ադրբեջանական հարձակումը տեսնում են որպես գոյաբանական սպառնալիք Ղարաբաղի ժողովրդի համար: Ադրբեջանի մաքսիմալիստական ​​սպասումների և մոտեցումների պատճառով մենք հայտնվեցինք պատերազմում»,- ասել է Վարուժան Ներսեսյանը: Նա նշել է, որ Ադրբեջանը սանձազերծել է «բլից կրիգ» հայկական ուժերի նկատմամբ, և որ Թուրքիայի բովանդակային աջակցությունը Բաքվին շրջել է հակամարտության կշեռքը:

«Ներսեսյանը մեղադրել է թուրքական նեոօսմանիզմին տարածաշրջանային խաղաղությունն ու անվտանգությունը խաթարելու և Թուրքիայի կառավարությանը՝ 1915 թվականի Հայոց ցեղասպանության գործն ավարտելու ցանկության մեջ և Ադրբեջանին ներկայացրել որպես պատրաստակամ հանցակից պատմական ոճրագործության մեջ:

Ներսեսյանը պնդել է, որ Ադրբեջանն ինքն իրեն մոլորության մեջ է գցում, եթե հավատում է, որ կարող է հայերից միակողմանի զիջումներ կորզել»,- նշված է լրատվամիջոցի հոդվածում: