Այսօր փոխոստիկանապետ Արա Ֆիդանյանը լրագրողների հետ ճեպազրույցում անդրադարձավ արգելված գրառումների դեպքում իրավապահ մարմինների կողմից իրականացվող աշխատանքներին։ «Այն կոչերի, ուղերձների, հղումների դեպքում, որոնք պարունակում են Վարչական իրավախախտումների վերաբերյալ օրենսգրքով նախատեսված հանգամանքներ, անմիջապես ձեռնարկվում են համապատասխան միջոցառումներ։ Ինչ վերաբերում է իշխանափոխության վերաբերյալ կոչերին, ապա այդ ուղղությամբ նույնպես աշխատանքներ տարվում են, սակայն հիմնականում քրեորեն համապատասխան հոդվածներով գործունեություն իրակացանում են իրավապահ այլ մարմիններ, դիցուք, դատախազությունը և ԱԱԾ-ն։
Հարցին՝ Վազգեն Մանուկյանի աղմկահարույց հայտարարությունից հետո ոստիկանությունը կապ հաստատե՞լ է նրա հետ, թե՞ ոչ, փոխոստիկանապետն ասաց․ «Վազգեն Մանուկյանի և կոնկրետ անձանց վերաբերյալ տեղեկատվություն չեմ կարող տրամադրել, սակայն երբ մեր մոնիթորինգի արդյունքում առկա է լինում Վարչական իրավախախտումների վերաբերյալ օրենսգրքով նախատեսված համապատասխան իրավախախտում, մենք զբաղվում ենք դրանցով»։
Ֆիդանյանը հավելեց, որ իշխանության զուտ հրաժարական պահանջելը պետք է դիտարկել համապատասխան կարգադրույթով։ «Եթե այնտեղ տեսնում ենք բռնության, բռնի տապալման կոչեր, ապա համարվում է իրավախախտում, եթե չկան նման կոչեր, ապա քրեական օրենսգրքով որևէ գործողություն իրականացնել հնարավոր չէ»։